عندما وجدت نفسى روحا بلا جسد

_بطراوى !!!! سوق بسرعة زى ما انت عاوز بس بلاش حركات مفاجئة عشان بنخض.-

-قلبك خفيف .-

هو انت مركب معاك شوال بطاطس ....انت بتبقى عارف انك هاتقف أو هاتلف ...أنا ببقى بتكلم أو بتفرج عالشارع .ألاقيك رازعنى فى--مطب .

_لو ماسوقتش كدا مش هانعرف نمشى -.

_أنا هاربط الحزام ...هى فين البتاعة ...على الله يكون شغال ؟ -

-شغال -

...............................

لسه بشد الحزام قام أحمد خد يمينه عشان يعدى من عربية نقل فى اللحظة اللى دخلت عربية هوندا من شارع جانبى .-.

-حاسب يا أحمد !!!!!!! -

خيشنا أنا والبطراوى فى العربية الهوندا وراسى اتخبطت فى التابلوه ....قبل ما أحط الحزام طبعا .

أغمى عليا ...ويمكن طلعت روحى ....التابلوه عليه بقعة دم وهدومى كذلك

الناس اتلمت ...شكلها كدا حالتى كانت خطر

بعد مناقشات متعجلة فضل البطراوى نقلى لمستشفى قريب وصرف النظر عن الحادث من خوفه عليا

كان عمال بيهز فيا وأنا مابحطش منطق .

كنت فى حالة ضعف شديدة ولا أتحمل خبطة فى تابلوه سيارة مسرعة وأنا جواها فضلا عن نزيف فى الرأس

شالونى بطريقة أو بأخرى

فيما سمعت صوتا ينادى :

-عمرو أمين عمران .!!!!!!!!!! -

نظرت بخاطرى لا بعينى تجاه الصوت الملائكى

-نعم ...رديت بأدب -.

الصوت الملائكى:تعال هنا !

-هنا فين ؟ -

الصوت الملائكى :حيث لا حيث

-نعم -.

الصوت الملائكى :أنت معملتش خير فى دنيتك ...

- يا لهوى !!!! -

الصوت الملائكى :اسكت خلينى اكمل ..ونظر إلى ورقة بين يديه كمن يلقى بيانا واستأنف أنت معملتش خير فى دنيتك .بس ما عملتش شر .عشان كدا صدر قرار بإنك تاخد قصر فى طرف السور فيه خدمات معقولة .

- معقولة إزاى يعنى ...إيه الأوبشنز بالظبط ؟ -

زغر لى صاحب الصوت الملائكى بعد أن تكثفت صورته حتى أراها وقال :

- تقصد إيه ؟ -

مين معايا فى القصر ..ومين الجيران ...وأقدر أروح فين ؟ومين اللى هايجينى ..وإيه الخدمات اللى جوا القصر ؟ -

الصوت الملائكى :عندك تليفون ..أطلب أى حاجة هاتجيك دليفرى .ومعاك فى القصر حبيبتك .ولما تسكن تقدر تضيف خدم وشغالين .وجيرانك ناس من مستواك .

-طيب ..القصر دا ملك ولا قانون جديد ؟ -

الصوت الملائكى :ممممممممممممم!؟ممكن تترقى وتاخد حاجة أحسن ..أنت واستعدادك لو كملت النقص اللى فيك

-ممكن أزور حد او حد يزورنى ؟ - الصوت الملائكى:ممكن ...بس ما تباتش بره.

-قبل ما أسكن عاوز اطمن على ناس معينة -

.

الصوت الملائكى :ناس مين ؟أنت غلباوى ليه

-سقراط وفولتير وغاندى

الصوت الملائكى :انت مالك ومال الناس دى !

-بحبهم وبحس إنى مديون ليهم .وعاوز اطمن عليهم -.

الصوت الملائكى : ملفاتهم مش معايا .

يعنى هما هايتحاسبوا بطريقة تانية ؟ -

الصوت الملائكى ممممممممممممم؟

- وحياتك يا ملاك ...شوفهم فين وطمنى عليهم - .

الصوت الملائكى :إيه دا ؟..بنى أدم غريب ...أنا ماليش دعوة بالحاجات دى --

بس أنا ليا -

الصوت الملائكى :اسمع ...قصرك هناك أهو تعالى اسلمهولك ونعمل جرد للحاجات اللى فيه

-إيه البيروقراطية دى ...يا ملاك دى الجنة من غير ناس ما تنداس .أنت ماسمعتش المثل دا ولا إيه؟

وأنا عاوز ةالناس دى

الصوت الملائكى :اسمع أنا مش فاضى ...عندى شغل ..فى واحد بعدك عالدائرى

.- ماليش دعوة ..هاتهملى ..ولازم تعرف إنى عاوز ناس -

تانية بس أنا إتفاجئت بموتى ...هاقعد مع نفسى شوية .وأقلك .بس التلاتة ....... دول أساسيين

.

الصوت الملائكى :أنت هاتعطلنى !!!...أقلك إيه بس ؟ماهو أنت لما لقيت نفسك فى الجنة اتدلعت .

- حاسب ؟!!!!!!!!! -

الصوت الملائكى :اللهم لا اعتراض

-بسرعة اخطف رجلك وهاتلى الناس دى معايا وإلا مش منقول من هنا -.

الصوت الملائكى :بص .فى هنا بند اسمه الشفاعة ..ممكن تحت البند دا نجيبلك الناس دى ...بس تملى استمارة شفاعة

-روح هاتها بسرعة ؟. -

عصام الحضرى _أحمد السيد _نادى المبادىء

..
فى ستين داهية يا عصام ...تبدل الأهلى بنادى هيالا فى سويسرا
وكأن سويسرا ارض الجحيم والبؤس وانعدام المستوى والمقارنة بكل ما هو أهلاوى

تعامل نادى المبادىء مع هذه القضية عبر توجيه الرأى العام الغوغائى إلى كراهية اللاعب العظيم
ومسحه من الذاكرة ..بل والتجريح فيه...

إنها المبادىء
فى حين لم يتعامل بنفس الطريقة مع لاعب آخر يواجه قضيه جنائية بالمعنى الحقيقى للكلمة
فاللاعب وسيط فى رشوة
ولكن القضية لن تضر مصلحة نادى المبادىء ولا مسيرته المظفرة من أجل الحصول على الدورى
من بين أنياب الأعداء
فما هو سر التباين فى أسلوب التعامل فى القضيتين؟
السر أنه نادى المبادىء
نعم بدون أى سخرية
مبادىء لا تعنى بالضرورة شيئا متعارفا عليه فكل واحد ومبادئه
الحضرى خرج عن قطيع الطاعة واختار لنفسه طريقا
رغم أن الحضرى اعتذر عن سفره بقرار من جانبه وهذا حقه
لكن اختيار فرد فى مؤسسه النادى الأهلى طريقا لنفسه
ليس من مبادىء النادى الأهلى
وإن كان هذا الفرد نابغا
والحضرى يدرك أن الأهلى يقضى على الأفراد ذوى الشخصيات القوية
ولا ننسى طاهر أبو زيد
وعلاء ميهوب
وطبعا الفاسد الكبير ذى الشخصية القوية أحمد شوبير
وصولا إلى ابراهيم سعيد
الأهلى يمثل المجتمع المصرى الأسرى
لا يعتبر فردية أى انسان الا لصالح السلطة الأبوية
رغم عدم ازعاج هذا الكيان الفردى
ويتغاضى عن الفساد الحقيقى من رشوة وكذب
وتضليل للناس
وإخفاء للحقيقة
حتى لا يشق عصا الجماعة
الأهلى ______________مصر

http://www.alarabiya.net/views/2008/02/27/46225.html

منتدى السد العالى

http://essamelhadari.mam9.com/

تأصيل لموضوع قديم

سؤال كثيرا ما أطرحه ودائما ما أجد نفس الاجابة التى تصدمنىتلك الاجابة التى أصبحت بديهية وغير قابلة للنقاش رغم سطحيتها وتكريسها لكثير من النفاهيم الخاطئة ومسئوليتها عن كل الشر المحيط بنا
السؤال :ما هى وحدة بناء المجتمع السليم ؟
الاجابة التى سئمت منها ولم أسمع غيرها من مثقفين وغير مثقفين كانت :
الأسرة هى وحدة بناء المجتمع!!!!!!!!!!!!
ولكن أنا أسال عن المجتمع السليم ….أو لنقل المجتمع الحرّ!!!
المجتمع السليم الحر يتكون من أفراد أحرار وليس من أسر حرة لأن تطبيق مفاهيم الحرية على البناء الأسرى غير سليم .فالأسرة الجيدة لا نصفها بأنها حرة .ولكن نصفها بأنها مترابطة ومتضامنه ويجمع “أفرادها”الحب والثقة المتبادلة!!!!!!!!!
ولكن فى موضوع الحرية :حرية الفكر وحرية الرأى وحرية السفر والتنقل لا نجد هذه الحريات تنطبق الا على أفراد ولا يستطيع أن يتحلى بها الا أفراد ولكى نصف مجتمع سليم بأنه حر فلابد أن أفراده “مكوناته”أحرار .
اذن :وحدة بناء المجتع السليم “الحر”هى أفراد احرار.
وفى مجتمعنا المصرى نجد الوضع مختلفا فوحدة البناء من وجهةمن وجهة نظر المجتمع بمكوناته المعتبرة وحتى من وجهة نظر المتعلمين هى الأسرة وهى بالتالى التى أفرزت وجهة نظر النظام .
وانعكاسات ذلك على الواقع كثيرة ومتصاعدة فى كل العلاقات بين الناس.
فالأنسان يعتبر غير كامل الأهلية ما لم يكن ضمن أسرة .فلا يستطيع أن يسكن الا مع أبوين ضمن أسرة .ولا يستطيع أنيستأجر منزلا مستقلا الا اذا كان متزوجا ولديه أسرة فالمجتمع لا يمنحه الأهلية الاجتماعية ويعتبره غير مؤهل وشخص غير معتبر وغير محترم ما لم يكن ضمن أسرة .
وأنا حين أتحدث عن ذلك أتحدث عن المجتمع ككل رجالا ونساءا .
فالمجتمع يعتبر الرجل غير المتزوج غير كامل الأهلية حتى يتزوج فضلا عن المرأة الغير متزوجة!!!!!!!!!!!!!
والمشكلة أن الأسرة عندنا هى أول ألية قمع فى حياة الإنسان .وتقدم للمجتمع شخص مقموع مقهور ماشى جنب الحيط لا بل جوا داخل الحيط.
“ومش بتاع مشاكل ولا وجع دماغ وعاوز ياكل عيش وعاوز يخدم أسرته “الى آخر ما يمدح به الإنسان فى مصر
والمشكلة أن الأسرة عندنا ممتدة تؤدى بشكل تصاعدى إلى القبيلة أو العشيرة عن طريق الأعمام والأخوال والأصهار وهى آلية منتجة للفساد .
فاعتبارات الاختيار لوظيفة ما ليست على أساس الكفاءة ولكن للأنتماء الأسرى .وكثيرا ما نرى فى بعض الشركات وظائف شاغرة ولكن أولوية الإختيار لأبناء العاملين وليست أولوية الإختيار للكفاءات كل حسب قدراته وحسب الموقع المطلوب .فالمسئول عن الإختيار لا يراعى مصلحة عامة ولكنه يراعى مصالح أسرته !!!!!
وهذا المثال يمكن تطبيقه على أعدة متعددة سياسية ,اجتماعية أو اقتصادية
فعلى الجانب السياسى مثلا نجد مسألة التوريث التى تكرس ثقافة الفسادولا تبالى بإرادة الشعب ولا بما يمكن أن ينتج عنها من تطورات تؤثر فى جودة العمل السياسى أو الخدمات المقدمة للمواطنين
ومن ناحية أخرى تنظر السلطة الأبوية المستبدة للشباب والمثقفين لبمطالبين بالتغيير نظرة أب مستبد لابن عاق فهم أى المطالبين بالحرية خارجون عن النظام الأسرى وغير كاملى الأهلية ويتحدثون مهما كثر عددهم كل عن شخصه ولا يمثلون على كثرتهم إلا أنفسهم .
وأنهم “بتوع مشاكل ومش بتوع شغل “إلى آخر ما يذم به الإنسان فى مصر
ةأن مطالبتهم بالحرية لو تم الاستجابه لها لتبدد نظام الأسرة البديع فى الفضاء وتماهى فى العدم فلا تجد السلطة الأبوية المستبدة من تستبد به فتنعدم الحاجة إليها
وكذلكيرى أصحاب المصالح والمسفيدون من الوضع القائم أنهم فى موقع الأخ الأكبر الذى يكرس استبداد أبيه ولسان حال المجتمع يقول :إسمع كلام أخوك يا حسنين فيرد حسنين :ليه يا بوى ؟فيجيب الأب :علشان أخوك الكبير يا ولدى !!!
فطاعة الآباء لمجرد أنهم أنهم آباء واجبة .وطاعة الرئيس لمجرد أنه رئيس واجبة وطاعة الأخ الأكبر الممنوح امتيارزات من أبية واجبة .
ولكن فى مجتمع حر مكون من أفراد أحرار لا يصح إلا الصحيح فلا طاعة لأب أو رئيس أو أخ أكبر إلا لمن يحترم الفرد وأهليته الشخصية فى تقبل الأمور أو رفضهاإذا شاء!
عندما يشيع هذا النمط نمط أب يحترم عقول أبناءه ,نمط رئيس يحترم مرءوسيه ونمط أخ أكبر لا يلوح بعصا الإرهاب فى وجه إخوانه حاميا لامتيازاته …فقط عندما يشيع هذا النمط يمكن أن نجد حريات .
.....فاستبدال الفرد المقموع لأسرة مستبدة بأسرة أخرى مستبدة لا يغير من واقع الأمر شيئا …

نصر بلا حرب

كنا بنتفرج على النهائى أنا والبطراوى والشربينى وسامح رمزى
سامح كان قلقان وبيقف على الكنبة مع كل هدف ضائع من عماد متعب
البطراوى استعد لتحميل متعب مسئولية الهزيمة فى حالة حدوثها
الشربينى كان يبتسم كل ما أبو تريكة ياخد الكورة
أنا كنت واثق من الفوز علشان خبرتى السابقة فى اللعب
لعبت فى دورى القطاعات فى الفترة من 1987الى 1991
واشتغلت كوتش والله العظيم فى ظروف معينة
الشوالى كان بيحسرنا على الفرص الضايعة
ويحسسنا إن دا فال وحش
لما زيدان نزل قلت للبطراوى
زيدان هايصطاد سونج فى واحدة بس تكون مرتدة
لأنى لو كوتش لازم أخلى واحد مستنى غلطة لسونج
وأنسب واحد لكدا هو زيزو
عشان عمرو زكى جسمه كبير
وعماد متعب شارد الذهن طول البطولة
يبقى زيزو وأبو تريكه ممكن يكسبونا
بطريقة ذكية مفيهاش طحن من عمرو ذكى
ولا حبس أنفاس زى ما متعب بيعمل فينا
المهم الجون جه فى توقيت كويس
البطراوى قال هاننزل الشارع
ياللآ البسو
قلتله الماتش لسه شغال
وأنا كخبير
مش هاطمن إلا مع صفارة الحكم
وكمان يا بطراوى
الشوارع مش هاتخلص
البطراوى مسك العلم بتاع الشقة
ووقف فى البلكونة وعمال يهتف
مصر مصر
سمح نزل من على الكنبة وجاب علم صغير من غير خشبة وفضل يرقص ويلعب مؤخرته
الشربينى فاشخ حنكه وهو يتمتم بكلمات أظنها عن أبو تريكة
أنا كخبير متحكم فى أعصابى
علشان كنت متوقع الفوز حتى على كوت دى فوار
وعارف اتوفيستر بيلعب ازاى وكلام تانى بضان
المهم نزلنا الشارع
اتارى الناس كلها نزلت الشارع
وكان ممكن الشارع يخلص
كل خمسين ستين متر شباب يوقفونا ويفضلو يرقصو ويطبلو
نقوم نطلع من شبابيك العربيه الهيونداى بتاع البطراوى ونشاور بالأعلام
يوسعولنا
البطراوى قال هانروح جنينة مول
الشربينى عجبه الكلام
عند اول عباسي العقاد من مصطفى النحاس
أمه لا إله إلا الله
وأمة المجد لله فى الأعالى
فى الشارع ومحدش عارف يمشى على رجليه
وكل عربية بحمولتها القصوى وبنات فى عمر الزهور راسمين على خدودهم المتوردة ألوان العلم
ودعابات هنا وهناك
شاورت لبنت قلتلها انتى من الكاميرن ؟
قالتلى بسذاجة
لأ
قلتلها زغرطى
فرفعت حاجبيها معجبة بالفكرة وفقعتنا زغروطة ملعلعة
هزت مصطفى النحاس ومكرم عبيد وعباس العقاد
وكل الليبراليين فى مصر
كل دا واحنا بتاع ساعة متحركناش خمسة سنتى
بطراوى !!!!!!!!!!
قاللى نعم
قلتله بينا على جامعة الدول
هناك هاتشوف حاجات اكتر
قاللى ياللا
خدنا مصطفى النحاس ودخلنا يمين فى الطيران
وقف البطراوى قدام مدينة طالبات الأزهر
البلكونات مرصوصة والبنات هايصين
واللى أودتها مش عالشارع واقفة فوق السطح
من بلوك لبلوك
لقيت بلكونه بناتها ساكتين
شاورتلهم بالعلم شاورولى
عملت بإيديا حركة
تشجعهم علشان يزيطو
زاطو
جه راجل شعره أبيض ومعاه بنت
لابس بالطو
ماركة انفستيجيتور
ومسك منى العلم بثقة
وحط راسه جوا العربية
وقاللى
ماتجيب العلم دا
وشد العلم
قلتله ليه؟
قاللى فرحة للأهلى
أنت مش فرحان ؟
قلتله لأ مش هاديهولك
قاللى ماتجيب يأخى
الراجل فاض بيه من غبائى
شديت العلم زى العيل الصغير وقلتله لأ
الراجل سحب راسه من جوا العربية وخبطنى بضهر ايده فى كتفى
وأشاح مبرطما بكلام عن جهلى وانانيتى وبخلى
البطراوى ساق فى طريق النصر
وعند المنصة
لقينا عريس وعروسة راكبية مرسيدس 300إس إى إل
راكبين ورا طبعا
شاورناله
ومبروك وكلام من دا
العريس طلع من فتحة السقف
والبطراوى يصور بالموبايل
العروسة
طلعت هى كمان من فتحة السقف وطبعا الحتة اللى طلعت كانت عرياة ملط
الشباب وقفوهم وزفوهم من تانى والعريس بيضحك بعبط
وعمال يشاور شمال ويمين
العروسة اتوترت شوية
شاورت للعريس بصلى
قلتله امشى
افتحله سكة يا بطراوى
البطراوى ساق لحد احمد عرابى المهندسين
وعاديك على الزحمة
اه
واحنا فوق الكوبرى لسه - نزلنا من العربية نتفرج على الشارع
عارفين مولد السيدة بيبقى عامل ازاى فى الليلة الكبيرة
قلنا ننزل وزيطة وزمبليطة والشعب كله فرحان
حسيت كدا بحالة من التوحد مابينهم بس أنا ماتوحدتش
ومكانش فى تحرشات من أى نوع
وكان فى عربيات نص نقل شايله عائلات بكاملها
رجالة وستات وبنات
الصبيان طبعا كانو على الأرض
وصواريخ وطبل وزمر
وكان فى عربية نص نقل شايلة دى جى
وعربية تانية فيها واحد بميكروفون بيمسى ويصبح ويضرب مليون سلام لمصر
بتاع ساعتين علشان ندخل أول جامعة الدول

البطراوى زهق واتخنق من السواقة
بس الزحمة مش هاتخلص
واحنا بنطلع الكوبرى قابلنا واحد عامل مكياج حسن شحاته الخالق الناطق
بس كان معاه بنت صغيرة
وبنت ييجى سبع سنيت فى ميدان سفنكس متحزمة ونازلة رقص
طلعنا الكوبرى موننا بنزين من شارع رمسيس
ورجعنا مدينة نصر
فتحنا اى ار تى
لقينا النصر له ألف أب
بس المذيع بدر بلال
قال إن مسئولين الكورة وجعو قلب جسن شحاتة
قام طاهر أبو زيد خلص الموضوع
وقال إن مسئولى الكورة هما اللى هايبوسو إيدين ورجلين المعلم علشان يقبل يقعد معاهم
أنا قلت فى بالى أنا مكان حسن شحاتة أوافق بس بشرط
إن أحمد شوبير يحضر أجتماعات الإتحاد بس مايقعدش على طاولة الإجتماعات
أومال يقعد فين ياأبو على
يفرشله ورقة جرنال على الأرض ورا الباب على طول

إقرو مقال نصر القفاص فى المصرى اليوم
http://www.almasry-alyoum.com/article.aspx?ArticleID=93073

a.r.t.

حد شاف ستوديو اى ار تى بتاع تحليل مباريات كاس الأمم ؟
أنا قصدى ديكور الستوديو !
على شمال الشاشة من تحت موجود جلوب
والجلوب هو نموذج للدنيا
مش عاوز أقول الكرة الأرضية علشان اللى عمل النموذج مش شايف إن الكرة أرضية
قبل ما ندخل فى الموضوع لازم نعرف إن الحاجات دى مش عبط كدا وخلاص
زى ما كل واحد مننا بيؤكد شخصيته فى كل قطعة فى منزله
سواء كانت للزينة أو للإستخدام العملى
ديكورات الستوديو هى كمان كدا
القصد.....
الديكورست المحترم عمل نموذج للأرض على شكل قبه
يعنى الأرض قرصية زى الحركة الوهابية ما شايفة
التصور دا هو اللى اتشنق جاليليو جاليلى علشان رفضه وزعم إن الأرض كروية ومن قبله كوبرنيكوس
دا طبعا فى عصر النهضة
رجالة اى ار تى الفقهاء لسه شايفين إن الأرض قرصية
دا حتى عامل مدار السرطان ومدار الجدى
ومحاوط الأرض بهاله زرقاء
يعنى مكان التقاء السماء والأرض على مرمى البصر ؟؟؟؟؟
طيب سؤال رخم
فين القارة القطبية الجنوبية ؟؟؟؟؟؟؟؟؟؟؟؟؟؟؟؟
طبعا الراجل اللى عمل الجلوب دا وحطه فى الحتة دى
فاهم الأية اللى بتقول الشمس تجرى لمستقر لها
يبقى الشمس هى اللى بتتحرك
والأرض ثابتة؟؟؟؟؟؟؟؟؟؟؟!!!!!!!!!!!!!!!!!!
أكيد كدا

المنوفية _شبين الكوم-سنة 1987

الطالب عمرو أمين ..مش دى أولى تانى

نعم أنا هنا

تعالى الأستاذ شاكر عاوزك

يتمنى أى طالب فى سنة اولى ان الأستاذ شاكر يعوزه

قام متفائلاونظر متسأذنا الى مدرسة العربى عواطف الخالية من أى عواطف

لا تستطيع ابله عواطف ان ترفض طلبا لعمرو

لكنها حبت تطمن

مين هايسعدها فى الحصة

بمعنى أصح مين اللى هايعرب النحو اللى على السبورة

سألت محمد عبدالواحد "رئيس اتحاد الطلبة

عاوزينه فى إيه

رايحين مدرسة المساعى المشكورة فى شبين الكوم

جاوبها محمد باشمئناط

فقد بدا على وجهها لهفة غريبة على عودة المنقذ

عمرو فهم الليلة وسأل محمد\ عبد الواحد عاوزين الأمين المساعد

ولا رائد الفصل بس

خليه ييجى

رد عبد الواحد ببديهية

نزلنا لقينا الناظر عبدالرءوف شحاتة

والوكيل محيى طه

والأستاذ شاكر ومجموعة من قيادات الطلبة

وعمرو ومجدى بس من سنة أولى

عمرو سأل عبواحد

شريف مجاش ولا محمد حمكشة

قاله لأ

عندهم حصة فرنساوى

طيب نجيب سليمان دويدار

طلب عمرو من عبواحد

الرسام ؟؟؟؟؟؟؟؟؟؟؟؟

سأل عبواحد

قاله آه

عبواحد ميل على الأستاذ شاكر فهز رأسه بالموافقة

عمرو قال :

فى أولى تانى "

جه دويدار وركب الأتوبيس المدرسى

للمساعى المشكورة

نزلوا قدام المدرسة

وقفوا شوية

البوابة انفتحت على مصاريعها

دخلوا أودة كبيرة فى وسطها ترابيزة كبييييييييييييييييييييييرة

وحوالين الحيطان رفوف

وعلى الرفوف كتب

تبقى المكتبة

عمرو خد كرسى ناحية الأستاذ شاكر

وعبواحد والآخرين

مدير المساعى المشكورة

كان مدير مدرسة عمرو من سنتين

بس عمرو مالحقوش

يعنى عبواحد وطارق أبو هاشم لحقوه

أبو هاشم فلسطينى

!!!!!!!!!!!!!!!!!!!!!!

بس لو كسرت زلطة هاتلاقى مكتوب جواها أبو هاشم المصرى

على فكرة عمامه يبقو محمود وموسى أبو مرزوق

بتوع فتح

عمرو قعد شوية وسمع خطبة بضينة من الأستاذ محمود شبل

رد عليه عبواحد بخطبة ملعلعة

المدرسة تحت أمركو

دا كلام محمود شبل مدير المدرسة

نلعب كورة

قالها عمرو بالفم المليان واستحسنها أبو هاشم

حتى سليمان دويدار بتاع الرسم

اللى عاوز يعمل حاجة تانية براحته

كلام محمود شبل بشياكته المعهودة

عبواحد قال انا هاتفرج عالكورة

عمرو نزل الحوش مع سليمان وايمن عبحكيم وطارق محمد السيد

ومحمد صقر بتاع تالتة اول ادبى

عمرو سمع العيال اللى بره الملعب بيقولو اسم اسلام زيتون

عمرو سمع صوت ارتطام قوى بالعارضة

كأنه بمرزبه

أى والله مرزابة

اسلام زيتون شاط شوطة

جت فى العرض كانت هاتخلعها من الأرض

عمرو نزل الملعب مع ايمن

شفت الشوطه

دا بيلعب فى الزمالك

ومنتخب الناشئين مع طه بصرى

اللى هايروحو كندا

بالظبط

عمرو طلب الكورة من طارق ومشى بيها

فات من واحد

راح ناحية الخط

عدل الكورة

لقى فى وشه اسلام

غمزها معرفش ازاى

طلبة المساعى هاصوا عليها

عمرو مشى شوية كمان بالكورة

وشاطها بكل قوته دخلت جون

اسلام زيتون يحسسك انه كابتن بسام

سنتر ورقص ايمن وقبل ما يفوت من سليمان خدها عمرو وطلع جرى على الجون

اسلام بيجرى وراه وعمل فرملة

عمرو كان رمى الكورة خطوتين ونط

اسلام زحف على الأرض

عمرو حط جووووووووووون

طلبة المساعى هايصين على اسلام

لقد تحطم رمز من رموز المساعى المشكورة

عمرو كبر واشتغل

وقرا فى الجرنان

مهرجان اعتزال اسلام فتحى

ياااااااااااااااااااااااااااااااااااااه

دى كانت ايام سودا

طبعا اسلام اسمه اسلام محمد فتحى زيتون

لعب دولى فى الفترة من 1993الى 1995ومعرفش احترف فين

حدث فى نت كافيه

مساء الخير ! ممكن جهاز فاضى

اتفضل

قعدت وفتحت الجهاز ومن بعده البلوج وقعدت اتصفح من هنا لهناك

عندما دخل شاب لا تفهم من هيئته شيئا وجلس الى جهاز جنبى

الولا فتح مواقع جنسية وشغل فيديو وأنا طبعا مراقب الموقف

كان فيديو بورناوى من النوع التقيل

الواد فاتح بؤه مشدوها من هول ما يراه

صاحب السيبر نت قام يتمشى فى سيبره الطويل قام الواد عامل ميبنيمايز للفيديو

ظهر الديسك توب

صاحب السيبر رجع لكرسيه

الواد عمل ماكسمايز للفيديو

وفتح اتنين تانيين على ما يحملو

يكون هو اتفرج على البورنو الفزيع اللى قدامه

خلص الأولانى

وشغل التانى

صاحب السيبر معندوش برنامج للوقت على الجهاز اللى على مكتبه معرفش ليه

أصل السيبر لسه جديد زى ماهو باين

كان حاطط ورقه عليها الساعة وقت الجهاز ما نفتح

أتاريه كان بيمر عشان يتأكد إن الهوا مطيرهاش أو اتزحلقت

تبقى مشكله والجنيه ونص يرحوا فى الفاضى

صاحب السيبر قال يمر على سيبره وهو حاطط ايده ورا ضهره

بيفكرك بالشاويش عطية فى فلم

إسماعيل ياسين فى البحرية

صاحب السيبر طب على الواد المتدهول فى الفيديوهات

لأنه مالمحش الورقة الصغننة اللى هو حاططها جنب الجهاز

الراجل خاف على الجنيه ونص

قرب من الواد

الواد من حظه كان لسه الفيديو الأخرانى مفتحش وكان عامل مينيمايز للأتنين التانيين

وكان لسه هايفتح

صاحب السيبر سأله على الورقة

قاله معرفش

قاله قوم كدا

الواد قام

صاحب السيبر لقى الورقة تحت الكى بورد

قاله خللى بالك منها

قاله طيب

الواد خد نفس جامد وبصلى

وكأنه بيقولى

تتفرج؟؟؟

بصيتله ورجعت للبلوج

صاحب السيبر قام يمر تانى

الواد جمد قلبه وفضل فاتح

قال بفلوسه

صاحب السيبر شاف لقطه من الفيديو

ياللهول

الوساخة

النجاسة

قلة الأدب

شغل الحوارى

الراجل انقض على الفتى المسكين

كجلمود صخر حطه السيل من عل

وقاله قوم اقف

شغل الحوارى دا مش عندى

ايه اللى انت حاطه دا

المكان دا محترم

هات جنيه ونص

وماتجيش هنا تانى

الواد دفع الجنيه ونص

ومشى

صاحب السيبر ميل عليا وقاللى

يا أستاذ مش كنت تقول؟!

قلتله :أقول إيه؟

قاللى خلاص خلاص

الراجل كان بيراهن على اخلاقى ؟

وثائقى الحزيرة

حضرت عرض فلم الجزيرة الأسبوع اللى فات وكان عندى فكرة انه تصدر ايرادات شباك التذاكر فى العيد

حضرته بعد ما حضرت خارج على القانون وهى فوضى؟وحين ميسرة وشيكامارا

أجلت حضورى للجزيرة لثقتى فى مشاهدة فلم جيد من اخراج شريف عرفة ولكن حصلتلى صدمة من مشاهدة الفلم ولى ملاحظات -يقدم الفلم الأجواء الصعيدية التى كرسها محمد صفاء عامر فى مسلسلاته التليفزيونية ذئاب الجبل والضوء الشارد -فالصعيد عنده رومانسى جحدا وحياة الصعايدة قائمة على مبادىء لا يتزعزع عنها الكاتب

هناك اصرار فى الفلم على تقديم المرأة الصعيدية بصورة الأميرة الأندلسية من حيث الشكل والمضمون (انظر الى ملابس زينة وهند صبرى المخملية وسلبية ادوارهن على طول الخط

لم يقدم الحكى شيئا عن بطولة الأب -محمود ياسين ولا كفاحه ليصل الى مرتبه زعيم الخارجين عن القانون وتوقعت تأجيل ذلك الى الكلام عن البطل منصور -أحمد السقا ولكن ما قدمه الفلم من تكسيره للكلوب اثناء اللعب بالعصا لايؤهله الى مرتبه زعيم طلبة مدارس

نوه الفلم أكثر من مرة لذكاء منصور وحدة ذهنه فقط عن طريق الحوار وكان من الأفضل اثبات ذلك عن طريق أحداث وصراعات داخل العصابة من ناحية وبين العصابة والشرطة من ناحية أخرى مثل تحريه الدائم عن ولاء اتباعه وكشفه للخيانة فى المهد ولكن ما حدث فى الفلم كان نوع من التعسف فقد قتل منصور الخائن دون أن يبرهن لى كمشاهد على خيانته أو يقنعنى بذكاء الزعيم

فى لقطة حوارية كعادة الفلم قال منصور ان أحلى شغل عملناه تحت عنين البوليس وتم التهريب بطريقة بدائية تنم عن بدائية فكر العصابة التهريبى وكسل الشرطى ولا أقول غباؤه (عمليه وهمية عن طريق سيارة اضافية يركبها منصور لتحويل انتباه الشرطة عن السيارة الحقيقية التى تحمل البضاعة

اتفق منصور مع رشدى وهدان -خالد الصاوى بشكل سريع دون مساومة حقيقية وكان وقت الفلم لا يتسع لذلك

سهولة اقتحام الشرطى الشاب لبيت منصور وتركيب كاميرات واجهزة تصنت بشكل لا يليق بعصابة محترمة ومنظمة

استمرار منصور فى العيش داخل البيت وادارة الشغل مع علمه بوجود اجهزة تصنت وهو امر يتنافى مع علمه وذكاءه الذى نوه عنهما الحوار

عملية الإقتحام رغم ضخامة التفجيرات واستخدام الهيلوكوبتر وقائد عسكرى محترف -عزت ابو عوف -لم تشهد مقاومة تليق بالبطل الذى من المفروض انه اتعب البوليس لإستدعاء تلك القوة فقد كانت صدمة لى أن أجد البطل يكتفى بتلغيم مدخل البيت بالديناميت ولمرحلة واحدة ثم أكتشف أنه اعتمد فى مقاومته على بطولة الأبطال من رجال الصعيد الأشاوس وهو ما تنافى أيضا مع ذكائه وقدرته التكتيكية المنوه عنها فيما سبق فقط عن طريق الحوار

بشكل عام كان منصور محور الأحداث - الحوار- ومتواجد فى معظم المشاهد وهذا ان كان مقبولا إلا أن هذه المشاهد كانت حوارية ولا تحتوى على أحداث

كعادته يعتمد أحمد السقا على نبرة صوت حادة ومنفعلة عمال على بطال رغم انه زعيم عصابة المفروض انها محترمة يعتمد زعيمها على التفكير

عموما الفلم يعتمد على قصة حقيقية وأنا كمشاهد حسيت انه فلم وثائقى لم ينقصه إلا صوت المعلق ليشرح ما أغفله السناريو

ويوطئ المشاهد لتفهم أجواء الفساد المحيطة بجهاز الأمن العام وعلى هذا الأساس كان من الممكن أن يعد للفلم هويدا طه وكانت النتيجة ستكون أفضل بكثير مما حصلت عليه من شريف عرفة وأحمد السقا ويا خسارة على الستنين جنيه حق 3 تذاكر وعشا فى تريانون سيتى سنتر ب175

اللهم اجعله خير

ههههههههههههههههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههه

ههههههههههههههههههههههههههههههههههههههههههههههههههههههه

عن بـدوى عـمران

صحوت من نومى العميق و لا أعرف كم نمت، كانت الغرفة نصف مضاءة نصف مظلمة عندما دخل رجل عجوز

لم أتبين ملامحه .. و لكنى أحسست بخطواته الهادئة المتسللة إلى قربى .. باغيا عدم أزعاجى.. سمعت صوته

- صباح الخير يا بنى

من صوته عرفته - انه عمى -

- صباح الخير

- أهلا بك من جديد

لم أفهم قصده .. و أحس هو بذلك فقد كان له من الاريحية الشىء الكثير.. قال

- سوف تستلم الميراث

- أى ميراث ؟

- ميراث جدك ووصيته

- بورك جدى و طال عمره ، ما الداعى

- لقد مات أبوك

- كيف ؟

- دفناه فى أطراف الحديقة

- متى ؟

- قبل أن تدخل فى نومك العميق

- لماذا لم يخبرنى أحد؟

- أنها وصية جدك،أقرأها لتعرف

- و أين أطراف الحديقة؟.. لقد عشت عمرى كله فيها و لم أرى لها سورا!.

- فى الطرف الغربى.. بعد أن تغيب الشمس

- هل هى غائبة الأن؟،أريد أن أزور أبى

- إن الطريق واضح .. جهة الغرب .. اذهب محتشدا لتراه

يممت طرف الحديقة الغربى و رأيت أبناء عمومتى يمرحون فى حديقتنا الوارفة ..ببراءة و ثغاء خراف يملأ الهواء فى مرعى مترامى الأطراف....إنهم سعداء أو يبدو ذلك ... هم أخوتى و أبناء أعمامى ...هل أنا مثلهم من السعادة و اللامبالاة ؟

عندما غربت الشمس ظهرت مقبرة، إنه قبر أبى، قضى عمره فى زراعة هذه الحديقة ورعاية سكانها ... استعان بى مرة فى زرع شجرة

و أخرى فى حفر بئر ، كنا وحدنا ... لم يطلب مساعدة من أحد من أعمامى أو أبنائهم .... قالوا كان يعمل وحده و لم يساعده أحد الا أنت

كان قبره ككل القبور ، لكنه قبر وحيد و عندما تجاوزت القبر لم أجد أطراف الحديقة و طلعت الشمس من جديد ...عدت مسرعا الى شاهد القبر حتى تغيب الشمس.وقفت صامتا أمامه مستحضرا صورة أبى و نشاطه كل صباح، لكنه لم يمرض ليموت و لم يصبه شىء و لم يؤذه أحد ... عدت الى عمى.

مشيت ما أعتقد أنه جهة الشرق وجدت الخراف نائمة و أبناء عمومتى يدخنون ملتفين دوائر فى أنتظار الشاى أو العشاء، لم يكلمنى أحد منهم و لم يعرنى أى منهم أنتباها عندما تجاوزتهم وجدت عمى منتظرا، كان الشيب قد كسا رأسه بشكل لم ألحظه من قبل، ايضا لم ألحظ هذه العصا من قبل، عمى هو أكبر أعمامى و إن كان أبى الاصغر لا اعرف كم من العمر يبلغ و لا أعرف ما دوره فى هذه الحديقة لكنه الان يتكلم عن وصية جدى.

- البقاء لله.قال معزيا

- أن لله و إنا أليه راجعون

- هل اطلعت على وصية جدك؟

- و كيف أقرأها و اين هى؟

- عند القبر أو فى الطريق منه أو إليه

- هل هى بعد القبر؟

- لا لا لا تكن غبيا.. عنده أو فى الطريق

- هل قرأتها أنت يا عماه؟

- نعم... و بكل وضوح

- و أبناء أعمامى؟

- يالغباؤك

هل هى من الوضوح الى هذا الحد ..قلت لنفسى

و بعد فترة من الصمت نهض عمى و قال

- تصبح على خير

لا بأس .. الميراث و الوصية.. و الميراث غير الوصية هذا فى عرف حديقتنا فلنبدأ بالميراث و نؤجل الوصية الى زيارة ثانية للقبر.

قبر أبى الفريد المنفرد الذى عاش وحده و مات وحده و دفن وحده

درت دورة واسعة فى الحديقة و لم أحط بها و لكن حاولت دائما ألا أبتعد عن وسط الحديقة حيث الحظائر و المساكن و الأشجار و معظم الأبار و سجلت ملاحظاتى فيما ينبغى عمله، و فى الصباح وجدت نفسى وسط أبناء أعمامى فى ساحة الرعى و حوالينا الخراف طلبت منهم المعاونة فيما ينبغى على عمله من أعمال الصيانة العاجلة و طرحت عليهم خطتى و رؤيتى للحديقة و تصوراتى للمستقبل و حياتهم و حياة الخراف .... لم يقاطعنى أحد و لم يرادفنى أحد منهم باعتراض أو بموافقة .... كانوا يستمعون الى فى ذهول

أعلمتهم أن العمل سيبدأ من الغد و فى الغد كان على صيانة بئر فى وسط الحديقة كنت عند البئر و فى دائرة واسعة حوله كان هناك الخراف و أبناء أعمامى نظرت اليهم راجيا يد العون و لكن لم يبال بى أحد لا هم و لا الخراف .. كانوا سواء.

ألقيت أدواتى الأرض غاضبا يائسا و عدت أدراجى رأيت عمى على البعد كان ينظر الى من زاوية عينه و بشكل لم أستطع معه سوى الذهاب اليه .. وقفت أمامه و أنا من الغضب فى نهاية، قلت

- لم يعاونى أحد

- فى ماذا؟

- فى تنظيف البئر الكبير

- كيف حفره أبوك؟ ألم تسأل نفسك؟

- كيف؟

- حفره وحده، و لم يكن معه مالديك من أدوات

- و أين كانوا أخوته؟ و أين كنت أنت يا عماه؟

- كانوا فى الحديقة ، ولكنه لم يطلب مساعدة و لم ينتظر أحدا منهم

كدت أساله عن دوره و لكن تراجعت إنه أكبر أعمامى الذين ماتوا كلهم الا هو ، و هو الوحيد الذى رأى الجد الكبير من سكان الحديقة

- اقرأ الوصية و لا تتعجل الميراث

- عماه .. كم عمرك؟

- كم عمرك أنت؟

تبا لى لم أسأل نفسى هذا السؤال من قبل و لكنى أتذكر أبى عندما كان يغرس أشجار المانجو جنوبى الحديقة ، و أشجار المانجو الأن وارفة كغابة كثيفة لا ترى الشمس أرضها، هذا عنى فكم عمر عمى؟

- عماه ... من بنى البيت الكبير؟

- أبوك

- و هل كان جدى حاضرا؟

- نعم كنا نجلس سويا هناك - و أشار الى البئر الكبير - فيما كان أبوك يبنى البيت

- و هل جدى راض عن أبى؟

- كل الرضى

- و أعمامى؟

- ما عليك منهم، هم لم يطلبوا رضاه و لم يستفزوا سخطه

- و هل يعرفنى جدى؟

- تمام المعرفة...إنه يحبك.. و يشفق عليك

- ألا يخشى على حديقته منى؟

كلا ، إنه يقدر حبك له و حبك للحديقة و متأكد أن حديقته لن تبور.

-------------------------------------------------------------------------------------------

هذا البوست كتبته ونشرته فى فترة سابقة ولكنى أجد الظروف الراهنة مناسبة لنشره مرة ثانية

ما أشبه اليوم بالبارحة

قيافا الكاهن الأكبر

إذا تحدثنا عن ذلك الرجل عيسى وعن موته فعلينا ألا نهمل حقيقتين بارزتين :التوراة وما تلزمنا به من رعاية لها ,وهذه المملكة وواجب روما فى الدفاع عنها.

ولننظر إذا :لقد كان هذا الرجل من المناؤين لنا ولروما معا فلقد بلبل عقول الدهماء من الناس .وساقهم سوق الساحر ليكونوا حربا علينا وعلى قيصر .

وكان موالى -رجالهم ونساؤهم- ما إن يستمعوا إليه يخطبهم فى الأسواق حتى ينقلبوا عصاة ناقمين .ولقد أبق منهم نفر ولاذوا بالفيافى والقفار مذ طلع علينا هذا الرجل .

وجدير بنا ألا ننسى أن التوراة هى مرجعنا الذى نعود إليه ,ومعقلنا الذى نلوذ به ونقوى .

وما كان لرجل أن يغلبنا على أمرنا ونحن نملك ما نضرب به على يديه .

وما كان لرجل أن يسلبنا بيت المقدس ما بقيت لنا أسوارها العتيقة بأحجارها قائمة كما خلفها داوود.

وإذا قدر لما بذر إبراهيم أن ينبت حقا ويؤتى ثماره ,كان حتما أن تبقى هذه التربة نقية طاهرة ..

فلقد كان ذلك الرجل عيسى من المدنسين المفسدين ,ولقد رددنا كيده فى نحره بما نملك من ضمير واع لا يدنسه شك ,ولسوف نرد كيد هؤلاء جميعا فى نحورهم ,أولئك الذين يبغون بشريعة موسى ذلة ومهانة ويحاولون أن يذكروا تراثنا المقدس بسوء

ولقد علمنا نحن وبيلاطس البنطى ما فى نفس هذا الرجل من شر وكان من الحكمة أن نجعل له نهاية .

ولسوف أعمل على أن ينتهى أتباعه إلى ما انتهى إليه وعلى أن يؤول رجع كلماته إلى سكون .

إذا أردنا لليهودية أن تعيش فحتم أن تعنو لها جباه المعارضين حتى تلصق بالرغام .

ألا لا عشت حتى أرى اليهودية تموت .

إذا لعفرت رأسى الأشهب بالرماد كما فعل النبى صمويل .ولنزعت عنى رداء هارون ووضعت على جسدى خشن الرداء حتى يدركنى الموت إلى الأبد.

من "عيسى ابن الإنسان "لجبران

حقا ما أشبه اليوم بالبارحة .

واحد واقف فى الشارع

اتنين فى التمانين

هو حاط كسكته وعندو تقوس فى الساقين

وهبوط فى الزعبوط

وشعرو أبيض من التلج

وهى ضهرها محنى لقدام زى نصف دايرة

مع تداخل الكتفين وانبعاج الضهر

ورغم ذلك

يمشيان متهامسين ولم ينسى كل منهما

أن يتأبط ذراع الآخر أنجاشيه

فاتو من قدامى دلوقتى

تقريبا رايحين يزورو بنتهم

مصرى فى ليبيا 2

فى صباح مثل كل صباح من الأيام المتتابعة فى ليبيا ....كان عمر المصرى يجلس مقابل مكتب المدير فى صالة عرض الحاج متولى

الضخمة فى طريق زناتة عندما أمسكت فتاة بيضاء مقبض الباب وأدارته ناظرة إلى السماء بأمل ...كانت ترتدى تايير بيج إلى الركبة على صندل رقيق مرتفع عن الأرض

فتحت الباب بحذر وجالت بعينيها فى المكان ووقفت .تحدثت حديثا مقتضبا مع يوسف الذى كان جالسا على أريكة بالقرب من المدخل

:يوسف إلى مكتبه مقابل عمر ثم قال
تبى تخدم .شن رأيك؟_

بتشتغل إيه؟-
بتقول خياطة-

:نظر عمر إلى مفيدة ومنى الجالستان عند الماكينات وقال

أنت قلتلها إيه؟-

قلتلها تيجى غدوة.-
هاتشغلها؟-

والله مانا عارف انت شن رأيك؟-

مافيش مانع .لكن أشوف شغلها الأول .ليبية؟-
جزائرية-

***********************

فى الحادية عشرة من صباح اليوم التالى جاءت الجزائرية تمتمت بكلام حسبه عمر سلاما على الحاضرين .وهى فى الطريق إلى مقعد كان خاليا بالقرب من مفيدة ومنى

لم تعيراها اهتماماولم تردا سلامها !سكتتا قليلا عن ثرثراتهما ثم استأنفتا متغامزتين

وضعت الجزائرية ساقا فوق أخرى فانحسرت الجوب المفتوحة من الخلف عن ساقيها

كانت تجلس بتلقائية ولا تضع أى مساحيق فيما كانت عيناها تائهتين فى فراغ المعرض الشاسع.

نزل يوسف من سيارة بيك أب بيضاء أمام المعرض كانت تقل اقمشة طلبها عمر فى اليوم السابق .

استلم عمر الأقمشة وأعمل المقص فيها قصا وتفصيلا وألقى تعليماته بوضوح على مفيدة ومنى فيما كانت الجزائرية تستمع باهتمام لاحظه عمر

استلمت منى ماكينة الأوفر فيما استلمت مفيدة ماكينة الخياطة وانطاقتا

-عاونيهم .قال عمر للجزائرية باقتضاب .فيما هزت رأسها بتلقائية-

اتصل فرج صاحب المعرض -معرض الحاج متولى -على الهاتف فرد عليه يوسف

-السلام عليكم شن حالك فرج؟-

-.............................-

-جبت القماش واللوازم وفضل 400دينار-

-..............................-

-موجود-

-.................................-

-فرج يبيك قال يوسف لعمر -

-أهلا فرج صباح الخير -

-صباح الخير عمر .شن صاير بحداك ؟-

-أبدا ...الشغل ماشى ...فيلا محمد خليفة ممكن نسلمها بعد بكرة-

-- واليوم؟ -

-عندى تسليم فيلا عبد الرزاق الحاج فى بن عاشور-

-تبى شى؟-

-اسمع فى هنا بنت خياطة بتسأل على شغل -

-دير رأيك لو تبيها شغلها -

- انت جاى المعرض اليوم ؟-

والله مانا عارف يمكن أتأخر شوية ويمكن آجى عالورشة -

أوكى سلام -

:فى الواحدة تماما وضع عمر الستائر المطلوبة طرف عبد الرزاق الحاج على البيك آب وركب فى السيارة وصاح

-حسين ...ياللا طالعين -

-وين؟-

- شارع بن عاشور قرب سفارة أوكرانيا ..عارفها ؟-

-سفارة شنى ؟-

-شارع الظل بعد الجامع عاليمين ...ماشى ؟-

-باهى ...باهى....هيا -

وصل عمر فيلا عبد الرزاق الحاج الموظف بمصلحة الجمارك الليبية ووجد عبد الرزاق فى انتظاره

-أهلا ...أهلا عمر باشا-

:ابتسم عمر وقال -

-اهلا عبد الرزاق ازيك-

-مصرى انت يا عمر مو؟-

- أيوه -

اتفضل ...خش-

....الحوش فاضى ..مافى حد ..اخدم على راحتك-

دخل عمر ووزع الستائر على الغرف وزاول عمله بنشاط فقد الح عليه هاجس العودة إلى المعرض مبكرا

وعندما انتهى من عمله نادى عبدر الرزاق

-إيه ..خلصت عمر ؟-

-أيوه-

--باهى باهى ...دقيقة العويلة عند الجيران خلينى نناديها باش تشبح -

-اتفضل-

دخل عمر غرفة الصالون أو ما يسمى المربوعة فيما تنقلت السيدة بين الغرف الأخرى لتعاين ستائرها

دخل عبد الرزاق الصالون وقال ببشاشة: يسلموا شغلك جنين ...دقيقة نوصلك

ركبا سيارة عبد الرزاق الستروين الزرقاء متجهين إلى زناتة

عندما دخل المعرض وجد يوسف جالسا إلى مكتبه فيما كانت منى ومفيدة مستمرتان فى العمل والجزائرية تجلس فى انتظار

-ها ...كملت ؟قال يوسف-

-كله تمام جه فرج؟-

-جه وطلع فيسا فيسا-

شاف الجزائرية ؟-

-قاللها تيجى غدوة -

-تشتغل ولا عشان يتكلم معها ؟-

-والله مانا عارف -

-علاش مخليها قاعدة طيب ؟-

دقت الساعة السادسة .موعد انصراف البنات .

جعلتا تطبقن الستائر فيما جعلتا عمل الغد بجوار الماكينات

طلبت الجزائرية من يوسف الإنصراف فهز رأسه موافقا

************************

حضر عمر كوبا من النسكافه واشعل سيجارة وجلس على اريكة وسط المعرض متسائلا فى نفسه

"متى تنتهى لعبة القط والفأر مع فرج .لماذا لا يأتى فرج إلا عندما يكون بالخارج ولماذا يتهلاب من مسئولياته ملقيا إياها على عاتقه .هل يشعر فرج بالعجز أمامه ..ربما"

مع دخول الليل زادت حركة الزبائن داخل المعرض فيما تعاون يوسف مع عمر فى تلبية طلباتهم

:مع الثامنة والنصف دخل يونس الصادق

-أستاذ عمر -

-نعم-

-هيا ارفع معايا المقاسات-

- وين؟-

-صبراتة..السيارة بره بنرفعك ونردك وين ما تحب ماشى ...هيا-

:كانت صبراتة على بعد 150كيلو متر ولكن تشجع عمر بالسيارة الكامرى انفينتى وشخصية يونس الصادق امرحة وقال ليوسف

-أنا هاتأخر بكرة شوية يمكن آجى الساعة واحدة أو اتنين بعد الظهر ...البنات عندهم قماش يشغلهم لليل ...بلغ فرج-

****************************

فى صباح اليوم التالى صحا عمر مبكرا ذهب إلى مقهى الدولفين .كان يفضله مثل كثيرين لأنه يقدم نسكافه مميز يصنعه صديقه الجزائرى محمد رابح

-صباح الخير محمد-

-أهلا عمر شن الجو -

-والله مليح يا محمد شن حالك انت-

مزيان ...نديرلك نسكافه كحلا ؟-

-أطلبلى معاها كرواسون -

-باه ..قال الجزائرى -

-هاقعد هناك-

استلم عمر طاولة 2وألقى علبة سجائره المارلبورو على الطاولة بلا مبالاة بعد أن أشعل منها واحدة وجلس منتظرا النسكافه والكرواسون

جعل ينظر إلى محمد رابح وهو يعمل خلف الماكينة القهوة واضعا فى خياله الجزائرية الباحثة عن عمل ...فقد كان يعتقد -وهذا حال المغتربين -أن أبناء كل أرض متشابهون هى بيضاء وهو أبيض هى ممشوقة القوام وهو كذلك استدارة الأنفين متشابهة

انتهى من الكرواسون وأشعل 3 سجائر مع كوب النسكافه وترك النقود على الطاولة وأشار للجزائرى مودعا .

:القى تحياته هنا وهناك فى طريقه إلى الشارع الرئيسى حتى اسوقف تاكسيا وقال له:

- زناته مدخل السريع -

عند معرض الحاج متولى ؟-

- بالظبط-

كانت الساعة العاشرة والنصف عندما دخل المعرؤض فوجد فرج جالسا على مكتبه ممسكا بدفاتره بينما يوسف جالس على كرسى مواجه للمكتب والبنات يعملن بنشاط والجزائرية تجلس على استحياء

نجح عمر فى استدراج فرج إلى المحل مع الصباح الباكر بزعم انه سيتأخر حتى الواحدة ظهرا

-السلام عليكم ...قال عمر وهو يحاول أن يدارى ابتسامه الإستهزاء على شفتيه-

-صباح الخير عمر .جعمز .قال فرج بارتباك-

:كان فرج قد انتهى من كلامه السرى مع يوسف كما انتهى من مراجعة دفاترة فقال عمر

عاوزك تتكلم مع الجزائرية وتشوف هاتشغلها ولا لأ-

-باهى باهى -

-كلمها دلوقتى علشان ماتروحش وتيجى كل يوم عالفاضى-

-أنت عاوزها معاك ؟-

-أيوة .فى شغل مفيدة مابتعملوش -

-كلمها انت -

:ذهب عمر اليها وقال

-صباح الخير -

-تحركت عيناهوشفتيها بارتباك بما يحتمل أنه الرد

بتعرفى تخيطى ؟زى كدا واشار إلى بعض القطع بالمعرض-

-هزت رأسها بإيجاب-

أشار إلى ماكينة خياطة خالية فجلست إليها فأعطاها قطعة قماش لتخيطها

انطلقت منها الماكينة بشكل لا ارادى .فقد كانت مرتبكة

أوقفتها ولضمت الإبرة وجعلت تخيط القماش بارتباك وحذر

-إنتى اسمك إيه؟-

-واش؟-

شن اسمك؟-

-.....نظرت مستفهمة وكانت من الأرتباك فى نهاية

-بيقولوا ليكى يا إيه؟-

-مفهمتكش!قالت بحياء واستغراب-

-كومون تابل تى ؟قالها بما تبقى له من فرنسية أكل الزمان عليها وشرب-

-آمال -

ابتسم ضاحكا فابتسمت فقال:

-تعالى كلمى فرج

****************************

بعد اسدال الستار

دخلت الحياة السياسية المصرية منعطفا جديدا بعد 26\3بعد أن أرسى النظام دعائم حكمه كما يريد بل كما لم يحلم أحد وانحدرت البلاد الى سفح التاريخ مستقرة عند القرون الوسطى حيث ينقسم الناس الى عامة ونبلاء .ولكن هذا لم يحدث فى غير مقاومة من المثقفين ومن الوطنيين وحتى من التيارات الدينية .فلماذا فشلت المقاومة ؟وهل من درس وراء ذلك ؟

تتكون أطياف المقاومة (المعارضة) السياسية المصرية السلمية المصريه من أطياف وانتماءات مرجعية مختلفة مثل اليساريين (شيوعى مصرى -اشتراكى ثورى -يسار ديمقراطى)-الاسلاميين(اخوان مسلمين -وسط اسلامى-لا هذا ولا ذاك)-ليبراليين (منهم من كان مرتميا فى احضان النظام ثم انشق عندما يئس من اصلاحه -ومنهم من جاء على خلفية ثقافية مرجعية بحتة )

هذه الفسيفساء السياسية الفاشلة لماذا فشلت ؟

فشلت لأنها تحمل فى طياتها عوامل فشلها !!!!!!!!!

انصهرت كل هذه الفسيفساء شكليا فى ما يسمى حركة كفاية التى أفرزت شباب من أجل التغيير .وهما وان غلب عليهما صوت اليسار الا ان الأمر لا يخلو ممن يؤذن للاسلام .أو ممن ينفخ بوق الليبرالية

هذا الانصهار ظل شكليا .وسيظل كذلك ان كان مكتوبا لهذه القوى أن تستمر لأسباب عديدة هى نفس أسباب الفشل _فشلها فى احداث أى تقدم _أو انجاز من قائمة مطالبها _بل ما حدث ولسخريتى كان عقابا للناس كل الناس على ما جناه البعض.

- رغم قرب أفراد تلك الحركات من الشارع واحساسها به الا انها لم تترجم نبضه بل لم تبال به لالتصاقهم بالمرجعية وانفصالهم عن الناس .

فكل طيف سياسى يفضل بقاء الوضع كما هو عليه على تقدم أى طيف آخر لحمل الراية

رغم أن بديهيات العمل السياسى تؤكد أنه عليك أن تتحالف حتى مع الشيطان لتتخلصا سويا من عدوكما المشترك .ثم عليك بعد ذلك أن تنقلب على حليفك المؤقت اذا وصل للحكم لتستكمل لائحة مطالبك-لكن هذا لم يحدث .رغم دراية الكثيرين بهذا التكتيك ورغم عقدهم لتحالفات كانت من الهشاشة بحيث لم تستطع أن تنفذمشروعا واحدا على الأرض .لأن صوت المرجعية كان أعلى من صوت المصلحة الوطنية المشتركة

- لم تستطع فسيفساء المعارضة المصرية بتنوعها افراز قيادة كارزمية تستطيع أن تجمع حولها المريدين والمؤيدين .ويلخص المطالب البرجوازية السياسية والعمالية الانتاجية وحقوق البسطاء والمهمشين فى شخصه كزعيم حتى يتعلق به العامة كأمل فى غد أفضل أو حتى كرسول العناية الالهية .هذه القيادة الكارزمية هى وحدها القادرة على حشد الناس فى صعيد واحد مهما اختلفت انتماءاتهم وتبديد الخوف من هراوة الأمن

- ولعل التاريخ المصرى الحديث يقدم لنا مثالا لذلك :فسعد زغلول لم يقم بالثورة سنه 1919 بل ان الحراك السياسى وقتها أفرز قادة قدموا للناس تصورا قادرا على التمرير فى الشارع وقتها

هؤلاء القادة صعدوا منهم سعدا ليحرك الناس ويحشدهم ولكن هذا لم يحدث فى الفترة ن 2005 الى 2007

فالبداية متشابهه فى الظرفين ولكن الخطوة التالية تمت فى 1919 ولم تتم فى 2007

- استطاع مصطفى كامل أن يغرس شجرة الوطنيه فى قلوب المصريين فى بداية القرن العشرين كما استطاع أن يستند على دعم دولى محدود .هذا الدعم الذى كان محدودا هو الذى استطاع أن يضع النظام السياسى فى موقف الحرج .ثم ما لبثت جذوة النضال أن اشتعلت اثناء وبعد الحرب العالمية الأولى مستفيد من التغيرات السياسية وخريطة جديدة للعالم على وشك الظهور -ظهور الاتحاد السوفيتى -هزيمة المانيا -احتضار الدولة العثمانية.فلم تظهر ثورة 1919العداوة للخاج الأجنبى الا فيما يخص مصر كبلد تحت الاحتلال البريطانى

وعندما نراجع لائحة مطالب حركة كفاية سنجد أنها فى حالة عداء مع المجتمع الدولى - أو ان شئنا الدقة فى حالة عداء مع ذلك الجزء الوحيد من المجتمع الدولى القادر على دعمها

هذا العداء مع الخارج جعل الخارج يغض الطرف عن الاستبداد بل ويتواطأ معه ويساومه على مواقف تخص الوضع الاقليمى مقابل غض الطرف عن الظلم

استجواب

اس:لو لم تكن مصريا لوددت أن تكون .... ؟؟؟؟؟؟.......
ج:آه لو تجينى فرصة الأختيار على المستوى دا .من كام سنة ركبت دماغى مع مصطفى كامل وقلت زيه لو لم أكن مصريا لوددت أن أكون مصرياوبعد كدا اتمنيت لو كنت فلسطينىواتمنيت لو كنت من غانا.لكن دلوقتى وبكل قواى العقلية أتمنلى لو كنت حصانا لأن الحصان نظيف وشيك ومعتز بنفسه ولا يمنعه ذلك من أنه يسمح لحد يركبه فى سبيل حاجة مفيدة وكمان يتميز عن أصدقائى الحمير بأنه ممكن يحرن ويرفض يشتغل .يعمل اضراب يعنى
س:أجمل شارع فى القاهرةوأسوأ شارع بردك
ج:أنا بحب شارع الجليفة المأمون وعلاقتى بيه كويسة الشارع مش واسع أوى ومش ضيق والمخل الملوكى اللى فى النص شكله رائع والرصيف الوسطانى تحفة
أما اسوأ شارع فدا كتير والمنافسة شرسة مثلا جسر السويس شارع غبى وعبور الطريق فيه مغامرة غير مضمونة العواقب ومافيش فيه مبنى واحد عليه الطلا كمان شارع عباس العقاد من أوله بنزينة حاجة تقرف وتصد النفس
س:أجمل ميدان فى القاهرة وأسوأ ميدان؟
أصلا عشان تشوف ميدان جميل فى القاهرة لازم يكون عندك نظرة سيريالية للميادين بشكل عام ههههههههههلكن بعد ما ألبس نظارة السريالية هاشوف ميدان مصطفى كامل رائع .صغنن ومحندق ومبانيه فيها نظرية ولفت نظرى من كام يوم ميدان الأسماعيلية فى مصر الجديدة لو شلنا منه المترو هايبقى تجفة.
أما اسوأ ميدان فهو ميدان تريومف لأنه مافيهوش ميدان أصلا جنينة كبيرة وعالية ييجى متر ومزروع فى النص شجر عالى بيحجب الرؤية رغم ان محيط الميدان ةخالى من أى رؤية شجرية دا غير عملية السطو المسلح من الملك حسين اللى حط كام طوبة علشام يعملوا الميدان باسمه .بعد كدا ييجى ميدان الحجاز .يااااااااااهميدان فاضى ومافيهوش حاجة
طبعا ميادين رمسيس والتحرير والعتبة خارج المنافسة بالنسبة لى على الأقل
س:احسن حى فى القاهرة وأسوا حى ؟
أحسن حى بدون منافس حدائق القبة .حى شعبى نظيف رغم ان فيه غوغائية وشرايط العنب العنب لكنها مهضومة وعاملة زى الملح فى الأكل بصراحة أنا بحسد سكانه.أما أسوأ حى فهو مدينه نصر سكانها مشروخين والحى مالوش طراز معمارى ومافيهوش ميادين والشوارع عاملة زى الكلمات المتقاطعهعة

س:أجمل مبنى وأسوا مبنى؟
ج:أجمل مبنى ؟سؤال صعب أوى .؟علشان نسدد الخانة بس هاجاوب .ممكن نعد فندق شبرد أحسن حاجة وحشة
أما أقبح مبنى فالمنافسة مولعة عندك الغرفة التجارية بباب اللوق.عمارة ايفر جرين فى طلعت حرب
مجمع شركات البترول طريق النصر .مجمع العمار بلازا اللى فيه المحل بتاعى فى مدينة نصر جميع مقرات الحزب الوطنى .
س:شخص تتمنى له الموت ونفسك ييجى يوم وتشمت فيه
ج:فى ناس لو ماتت حال الدنيا ممكن ينصلح
عندك مثلا الملك عبد الله ابن عبد العزيز زاخوه ولى العهد وكل ابناء الملك عبدالعزيز الهى يروح جهنم
عندك القذافى وكوندليزا رايس الصادق المهدى وحسن الترابى
س:شخص تتمنى أن تقتله بيديك؟
ج:اللوا بتاع الداخلية اللى دايما يطلع يقول محصلش محصلش أحمد شوبير ابراهيم واسماعيل يوسف محمد حسام الحكم اللى بيذيع كورة نادية الجندى مفيد فوزى لوسى كل مذيعات ومذيعين التليفزيون المصرى
س:شخص تتمنى له الصحة والسعادة؟

ج:رامى وبسمه \عمرو ورضوى \مصطفيتش ابن حفصوتشا وأمه حفصوتشا\ سيزر ديابلولوحده\عمر اسد لوحده\\\
والعبد لله
س:مافيش حد عاوز تقوله سايق عليك النبى بلاش تعيش الدور؟
ج:محمد سيد طنطاوى \كل شيوخ الفضائيات
س:تقول لمين ارحم دماغك؟
رفعت السعيد \ اسامة الغزالى حرب \العبد لله\تمر حنه الخدامة أو اللى مش عاوزةتفضل خدامة
س :بماذا تنصح جيمى هود صاحب مدونة تخاريف؟

ج:الواد فنان ولسه عود أخضر وداخل براسه شحط محط .والشحط محط مايأكلش عيش فى البلد دى .يا جيمى يابن هود غير المعسكر بتاعك والعب بأسلوب لجل ما نعلا ونعلا ونعلا لازم نطاطى نطاطى نطاطى .
س:المرحومه فايزة أحمد غنت قالت :
أنا لست أبكى منك بل أبكى عليك
يا من على جسر الظنون تركتنى
أنا لست نادمة عليك لكن على
قلبى الوفى قلبى الذى لم تعرف.
الكلام دا مش جايلك على وجيعة؟
ج:كل المثقفين المتحالفين مع النظام يساريين ولا ليبراليين ولا أى معسكر آخر من أول أنيس منصور مرورا أسامة انور عكاشة وعبد المعطى حجازى وصولا الى جمال الشاعر وكل مثقف ارتمى فى احضان النظام
س:لو مالقيتوش تتوه .هو نقطة بدايه .هونقطة نهايه.هو نقطة التقاؤ.هل فى حياتك هذا الشخص؟
ج:ايوه رامى صيام لو مالقيتوش أتوه هو نقطة البداية وهو نقطة النهاية وهو نقطة الألتقاء ونقطة النظام كمان .دا غير ان رامى لو ماجاش الشلة هاتتفركش
س:منصب تتمناه؟
ج:ههههههههههههههه قول منصب لا تتمناه المناصب كتير عندك مثلا رئيس الجمهورية أو حتى نائب الرئيس دى مناصب فاضية وفى نفس الوقت سهلة وشغلها بسيط
وعلى المدى القريب نفسى أعمل نقابة للمهنة بتاعتى وأكون أول نقيب طبعا الريادة مهمة بالنسبة لى كمصرى لو لم يكن مصريا لتمنى أن يكون حصانا
س:منصب ترفضه لو عرض عليك؟
كتير بردك.\ناظر عزبة مصر قصدى رئيس الوزرا \\\ رئيس تحرير اى جريدة قومية\شيخ الأزهر\ \ بطريرك الكرازة المرقسية \أى منصب أمنى من أى نوع ؟
س :هل لديك أقوال اخرى؟

ج:اذا سقطت المرأة صارت عاهرة واذا سقط الرجل صار شرطيا