لغتنا الجميلة

لفترة طويلة جعلت اللغة موضوع بحثى

واتفقت مع كثيرين على اعتبار المواضعة اللغوية أصلا فى اعتماد الفاظ معينة لدلالة معينة

وكثيرا ما كان يطن بأذنى أن اللغة العربية غنية بمفرداتها وقادرة على التعبير عن المعانى بكفاءة أكثر من أى لغة أخرى .

ولعل مجهود أعضاء المجامع اللغوية واضح فى هذا المجال فهم يصرون على تجاهل المواضعة اللغوية التلقائية من طرف الشارع ويلجأون لمواضعات لغوية متكلفة كتسميتهم الراديو (إذاعة )والتليفزيون (مرناة )


هذا فقط لإصرارهم على ان مجموعة الجذور اللغوية المتوفرة منذ اكثر من ألف وأربعمائة عام وحدها قادرة على الوفاء بما نحتاج من مصطلحات وليس علينا إلا إدخال هذه المصطلحات فى آلية الإشتقاق العربية واستخدام الحروف الزائدة للدلالة على الفعل أو الإنفعال أو التفعل أو الإستفعال .....إلخ


ولفترة قصيرة مضت لاحظت عجزى عن التعبير عن حدث متكرر ولكن المواضعة اللغوية الرسمية تجاهلته


هذا الحدث هو الفعل الجنسى بين ذكر وأنثى


فتسمياته جميعها ترجع لمعنى مجازى


ففى القرآن ترد آية تقول (فلما تغشاها حملت حملا خفيفا فمرت به )وقوله تغشاها يقصد به الفعل الجنسى .وواضح لكل ذى لغة التعبير المجازى الذى اتسم بالحياء


وشيوخنا لا يستخدمون سوى لفظ الجماع للدلالة على الفعل الجنسى ومجازيته واضحة من الاجتماع والخصوصية .


وعندما نستطرد فى البحث سنجد مفردة (إيلاج )وهى تعنى (إدخال )وهى تنطبق على إدخال سيارة فى مرآب أو خيط فى فتحة إبرة

حتى لفظ نكاح المقصود به الزواج وليس الجنس حتى هذا اللفظ مجازى فنكح بمعنى ضرب



خلاصة البحث أنه ليس هناك لفظ عربى واحد يعبر عن الفعل الجنسى مباشرة


حتى فى العاميات المحلية المختلفة بين الأقطار العربية سنجد لفظ مجازى يعبر عن الفعل الجنسى


ففى مصر نستعمل كلمة (ناك)كفعل للدلالة على الفعل الجنسى وهى تعنى ضرب بل هى مستخدمة بدلالتها المباشرة (ضرب )فى المغرب العربى


سمعت مرة سيدتان من تونس تقول احداهما للأخرى :وناكنى على راسى !!! بمعنى ضربنى على رأسى


واللفظ المستخدم للدلالة على الفعل الجنسى فى تونس هو (كسَر) بتشديد السين وهو موازى للمصطلح المصرى .


واستنتاجى الوحيد من كل هذا ان العقل العربى يحاول أن يتجاهل الجنس أو الفعل الجنسى إن شئنا التحديد كعقل يدعى الفضيلة فلم يضع مصطلحا للدلالة على هذا الفعل رغم كثرة المرادفات التى تصف الفعل الواحد على أصعدة أخرى.





إذا وضعنا هذا فى اعتبارنا عند النظر إلى المعارك الدائرة هنا وهناك ومن وقت لآخر حول( الحجاب- الحرية الجنسية -الاختلاط ) وأى موضوعات ذات علاقة


سنلاحظ دون جهد كثير مدى العنف اللفظى المستخدم من جهة المحسوبين على العامة ومؤيدى الوضع القائم


بل والتخندق أمام مفاهيم قمعية للنساء وتربط بين الفضيلة وبين وجهات نظرها الغوغائية





ولأن اللغة هى صورة الفكر... و الفكر هو مادة اللغة



علينا أن ندرك مدى صعوبة معركة التنوير فى الجبهة النسوية

فالمشكلة ليست فى الرجال فقط كما انها ليست فى النساء فقط


بل هى كامنة فى طريقة التفكير المتداولة نفسها أو فى اللغة التى يدرك الناس بها ما يقصدون من أغراض

هرتلة

نزلت الشارع الساعة واحدة بالليل اشترى علبة سجاير
كنت لسه حاطط كومنت على بوست بتاع واحد ملحد
تريقة مش على الإلحاد لا سمح الله
تريقة على المؤمنين مش على الإيمان
كلامى كان بيرن فى ودانى وبفكر فيه
كان عن السما وفوق وتحت
فكرت أروح طوكيو وأخلى البطراوى يقف فى نيو يورك
ونبص للسما فى ليلة من ليالى الصيف الصافية
ويقولى هو شايف إيه
افتكرت ساعتها انى من زمان مقعدتش أتابع مجموعتى النجمية المفضلة
كوكبة الجبار
من زمان أوى مقعدتش أتابعها بالليل أشوف مكانها بينتقل فين
وعلاقتها بالنجوم التانية
مجموعة الثريا بردك تبعنا
من سنة 2002مشفتش سما
أعمل إيه بس ؟؟؟؟؟
عموما البطراوى أصلا مابيفهمش فى الفلك ومكانش هايعرف يوصف

بس اللى أنا مستغربله
إزاى مجموعة زى الدب القطبى بتبقى باينى لكل سكان النص الشمالى طول السنة

كنت هاقعد أذاكرها للبطراوى وابعته نيويورك واستناه فى طوكيو ونشوفها سوا
ممكن تكون باينة من المدينتين بس هاتبقة على حافة السما وممكن تقع
فى الميه؟؟؟يالهوى !!!!!!!!!!
ومين المسئول عن كدا
لالالالالالا مش معقول طوكيو مش مدينة ساحلية مستحيل تقع منى فى الميه
بس لازم البطراوى يخللى باله حتى لو كان ساحل نيويورك شرقى
ممكن فى حل
أروح أنا نيويورك وأخللى بالى أنا
بس البطراوى مابيعرفش يتكلم يابانى
سؤال
لو انطلق منى شعاع نحو السماء فى نيويورك
وانطلق من البطراوى شعاع فى طوكيو
أين يتقاطع الشعاعان؟

من وحى وقفة المناهضة للتحرش

رحت الوقفة بتاع مناهضة التحرش ومناصرة آسر ياسر علشان كذا سبب أولهم إت مضايقة الناس بتزعجنى جدا ।عموما مكنتش متوقع حاجة تتغير بسرعة كدا بعد الوقفة دى بس لما روحت ونمت حلمت خير اللهم اجعله خير إن كل أطراف القضية ربنا هداهم
القاضى رجع فى كلامه وأعاد النظر فى القضية وحكم بإن الواد مذنب
بس أهل الواد المذنب ركبوا دماغهم عشان مستقبله مايضيعش
والإسلاميين طالبوا بالحق فى التحرش بالغير محجبات
وكمان طالبوا بتنظيم الحق دا علشان ميبقاش فى زحمة أو أى سلوك غير حضارى
حكومتنا الرشيدة استجابة للمطلب الشعبى دا وكرد فعل وعلشان مانتفضحش فى المجتمع الدولى اللى ممكن يبقى فى حالة غضب وعلشان نقنن التحرش عملت اجراءات مبتكرة
تخصيص نص عربيات المترو للسيدات والنص التانى للرجال وركوب أى عربية فى المترو إجبارى حسب الجنس
تخصيص سوبر ماركت للرجال وآخر للسيدات على أن يكون محلات مترو للرجال وأبو ذكرى وأولاد رجب للسيدات
تخصيص شوارع عباس العقاد وأحمد فخرى للرجال فقط بينما شارعى مكرم عبيد وحس مأمون للسيدات
تكوين شبكة من التاكسيات باللون الأحمر للنساء فقط على أن تقود التاكسيات نساء
تخصيص مولات سيتى ستارز والسراج مول للرجال بينما سيتى سنتر وجنينة للنساء
تقسيم المحلات اللى زى كنتاكى وتكا والشبراوى وآخر ساعة إلى سلسلة زى السبحة فرع رجالى واللى بعده نسائى
جميع خطوط الأتوبيس إلى نصفين نص رجالى ونص نسائى بالدور بين كل أتوبيسات الخط من أول المحطة
بناء مطار جديد متاخم للمطار القديم للنساء فقط
فى كل إشارة مرور يقف اتنين عساكر أو ظباط ظابط رجل وآخر بنت
بس فى الشوارع المخصصة للسيدات يبقى الظابط ست
ولو الشارع رجالى يبقى الظابط رجل
تخصيص جامعة القاهرة للسيدات وجامعة عين شمس للرجال
تخصيص إصدار خاص من جريدة المصرى اليوم للسيدات ويكون بشكل يومى ويكون اسمه المصرية اليوم إسهابا فى الفصل بين الجنسين

على عامة الشعب ابتكار ما يرونه من ادوات وفعاليات من شأنها المزيد من الفصل بين الجنسين بدون الإخلال بمبدأ المساواة وتكافؤ الفرص

فالمرأة نص المجتمع

اقراhttp://www.moheet.com/show_news.aspx?nid=247280&pg=1

رجل أعمال بالفطرة __وجدتها وجدتها

عندما أقرر تغيير اتجاه حياتى العملية لابد لى من طريقة عيش تحقق لى دخلا محترما بسهولة وبدون تعقيدات كما تحقق حظوة واحتراما فى المجتمع وترشحنى للعمل العام بعد التقاعد
وبالتأكيد لابد أن أتمسك بنفس المنهج المستقل فى العمل الحر مهما كانت العواقب

وجدت الفكرة الرأسمالية التى تتوفر فيها كل المواصفات السابقة
الفكرة ببساطة شدية مبنية على منافسة الكيانات الكبيرة بمؤسسة صغيرة سريعة التفاعل مع الأحداث وتقدم خدمة ذات جودة أعلى فى نطاق ضيق
الفكرة أيها السادة هى

قسم شرطة فى حى شعبى













يقدم القسم خدمات أمنية رخيصة ومتميزة وبتكلفة أقل فمثلا:
طوابع الشرطة بجنيه ونص بدل تلاتة جنيه
الفيش باتنين جنيه ونص والبصمات من عندنا
توزيع رجال شرطة محترفين على جميع الشوارع ليلاونهارا داخل نطاق الحى الشعبى
كل رجل شرطة محترف عليه أن يعاون المواطنين
عليه أن يساعد اللص فى انجاز سرقته
عليه أن ينقذ المرأة المستغيثة من حريق فى الدور الرابع
عليه سكب البنزين على النار إذا وجد موظف بيحرق مخزن

عليه ضرب اللص الممسوك مع المواطنين
عليه تحرير مخالفات مرورية للمواطنين المخالفين
عليه قبول الرشوة اذا عرض المواطن ذلك
ليس له الحق فى المطالبة برشوة
اذا تحرش احدهم بفتاه عليه تجاهل الموقف
اذا نبهه احدهم لجمال احدى المارات عليه ان يتحرش بها معه
اذا استغاثت المتحرش بها على الشرطى أن يطلع ميتين أهل أحدهم
-----------------------------------------------------------------
الفصل التانى
داخل القسم
تنتهى جميع المحاضر داخل القسم
فضباطنا قادرون على القيام بدور القضاء
لا تصالح
جميع المحاضر لابد وحتما تاخد احكام حتى اذا ارتضى الخصوم التصالح
اذا طلب احد طرفى النزاع التصالح تضاعف له العقوبة
-------------------------------------------

العقوبات وادوات التعذيب
تبدأ العقوبات من الضرب على القفا ولا تنتهى عند حد
جميع أدوات التعذيب جديدة ومعقمة (مش ناقصين بتوع حقوق الانسان)

من الممكن استعمال اداة التعذيب لمرة واحدة وارمى

انتزاع الاعترافات فن بوليسى بحد ذاته
المتهم اللى هانكون محتاجين اعترافه بس مش راضى يعترف
هانفرجه على أفلام رعب طول الليل

لو ماعترفش بردك!!
هانقعده مع معتز الدمرداش
أو يتفرج عليه فى الفلتزيون
--------------
الزى الرسمى لشرطتنا المحترمة بدلة فوشيا بأساور اخضر فوسفورى
كل شرطى من أعضاء هيئتنا الموقرة لازم يحط فى بقه لبانة

لازم نستعمل وسيلة نقل مفتكسة جدا بس مش عارف إيه ؟؟

شعار الشرطة

إخدم نفسك بنفسك الشرطة مش فى خدمة حد

زورونا تجدوا كله تمام








قسم شرطة فى حى شعبى

منى الشاذلى __نزار قبانى

كتب المغفور له نزار قبانى قصيدة بعنوان "رسالة من امرأة حاقدة" يرسم فيها مشهدا لعلاقة انسانية خاصة وحميمة او كانت حميمة -من موقف عاشقة تعرضت لخيانة من عشيقها ؛
القصيدة ترد على ذاكرتى الحديدية بإلحاح غير مسبوق ,وهى حين تلح على ذاكرتى الفولاذية تريد أن تذكرنى بتشابه موقف عبد الرحمن فارس (أو لنقل شبا6 ابريل).....كعينة من الشباب المثقف,يتشابه مع موقف العاشقة المخونة أو لنقل فايزة احمد التى تغنت بالقصيدة نهاية السبعينات والتى لا تذيعها الإذاعات المصرية رأفة بمشاعر البسطاء والسذج من عامة الشعب المصرى غير باخلين على اسماعهم بأغان من عينة "مصريتنا "التى غناها محمد ثروت فى زى ضابط شرطة,
القصيدة ألحت على ذاكرتى متأكدة من قدرتى على التعويض عن أطراف المشهد الشعرى لنزار قبانى بأطراف من المشهد السياسى وتظل المعادلة صحيحة ,
يحكى نزار قبانى على لسان عاشقة مخونة حاقدة على عشيقها الخائن فيقول:

لا تدخلى !!!
وسددت فى وجهى الطريق بمرفقيك,
وزعمت لى أن الرفاق أتوا إليك,
أهم الرفاق؟
أم أن سيدة لديك؟
تحتل بعدى ساعديك,

إنى أراها عند الموقد
أخذت هنالك مقعدى
فى الركن ذات المقعد
وأراك تمنحها يدا ممدودة ذات اليد

ستردد القصص التى أخبرتنى
أيام كنت تحبنى
حتى إذا عادت إليك
ظمآى لموعدها الهنى
أخبرتها أن الرفاق أتوا إليك
يا من على جسر الظنون تركتنى ....
أنا لست آسفة عليك
لكن على قلبى الوفى
قلبى الذى لم تعرف

يا من على جسر الظنون تركتنى
أنا لست ابكى منك بل أبكى عليك॥

أطراف المشهد
-الراوية "المرأة العاشقة التى تعرضت للخيانة "ويوازيها عبد الرحمن فارس
-العاشق الخائن ويوازيه منى الشاذلى
-شقة الملذات ويوازيها مصر
-المعشوقة الجديدة ويوازيها اسراء عبد الفتاح
-الشاعر نزار قبانى -ويوازيه العبد لله


بالتعويض عن اطراف المشهد الشعرى فى القصيدة باطراف المشهد السياسى من رؤيتى الخاصة نجد أن منى الشاذلى "العاشق الخائن" استضافت اسراء عبد الفتاح"العشيقة الجديدة المخدوعة "فى يوم الاضراب وامتنعت فى نفس الوقت عن استضافة أى من شباب ابريل "عبد الرحمن فارس"العاشقة المخونة فى حوار بشأن مصر "شقة الملذات

استدعت منى الشاذلى المثقفة الخائنة اسراء عبد الفتاح الساذجة واجلستها على نفس المقعد الذى اجلست فيه أحمد زويل ومحمد البرادعى وكل عشاقها المخدوعين
وامتنعت عن استضافة المسكين عبد الرحمن فارس الذى يمثل دور البطلة
ومارست على كل ضيوفها نفس ألاعيب الخداع المتكررة بالشكوى من سوء حالة الوطن "شقة الملذات"
وانتهت معهم من وضع النقاط فوق الحروف لكتابة روشتة علاج الوطن من امراضه
حتى اذا جاء التمرجى ليعطى المريض حقنة فى طيزه
سدت منى الباب فى وجهه بمرفقيها وزعمت ان الرفاق اتوا اليها وعندها حوار مهم مع السيدة سارة برنار "اسراء عبد الفتاح

إمسك ...مثقف مدعى

السيدة منى الشاذلى استضافت الدكتور محمد البرادعى وأثناء الحوار انكشفت منى على حقيقتها الضحلة ,والفقيرة لغويا ومعرفيا
ولعلم الجميع ضحالة اللغةدليل قاطع على ضحالة الفكر
الأستاذ البرادعى قال:لازم الناس تتغير ويطوروا مفاهيمهم عن الانسان والوطن حتى لو هايتصدموا(انتى فاهمة يا منى)
منى كان لازم تحسس الضيف المشهور اللى هيا جايباه انها فاهمة فقالت:بس كدا هانصطدم بالثوابت بتاع الناس وعاداتهم وتقاليدهم !!!!!!!!!!!!!!!!!!!


لم افهم منها كيف نسعى للتنوير والتغيير ونخشى على الناس من صدمة المعرفة

البرادعى نبهها الى غلطها فى الميل تجاه السائد بين الناس


امبارح كانت بتعارض الاضراب على اساس انه مش من عادات المجتمع المصرى
قالت اننا ممكن نتقبل اضراب صغير فى مصنع او حتى نقابة

لكن اضراب عام دى فكرة مرفوضة وغريبة عن سلوكياتنا ؟؟؟؟؟؟؟؟؟؟؟؟؟؟؟؟؟؟؟؟؟
ناسية او متناسية ان الاضراب العام ما هو الا مجموعة من الاضرابات الصغيرة

لكن نقول ايه ؟
انها تدافع عن امن الدولة

فى المحبة

-إلى متى هذه المعاملة؟
:أية معاملة ؟مم تشكو؟
-هى ليست جفوة كما إنها ليست إهمال!لكنها دفعات متتالية من الصفعات!!!!
:ألم تطلب معاملتى؟
-الوصال لا القتال
:من صبر على قتالى اقترب من وصالى
-لكنك تدحر منازليك,ولا قبل لى بك
:فماذا تريد؟
-لا أطيق التملق ولا المتملقين ,هل أصلح للوصال؟
:لا تطلب مودتى على جناح العز ,اجعل الذل مطيتك
-ألهذا أجدها متسعة على كل حقير أو ذليل
:نعم!!!!!!!ولكن ليس هذا وصالى ولا مودتى
-رغم ما قدموه من ذل لم تقدم الوصال ولا المودة!!!!!!!!!
:قدمت عطية للمتملقين الأذلاء ففرحوا بالعطية ولم يلتفتوا إلىَ
-تستطيع إن شئت استبقيتهم لديك
-لا يصلحون لمجالستى
:وهل اصلح أنا ؟
-أطلبك وتطلب عطيتى ولم تقدم بين يدى دعواك ما يشفع
:هل ترعى الرشوة؟
-أرعى الأدب
:نفسى وما ملكت
-لا أقبلها إلا إلا مقهورة
:هى لك .......اقهرها أو اقتلها
-آتية لا محالة مقهورة
:السفر محنة ...هل من معين؟
-على السفر
:بل على ضرب الحبيب.....

بسنت

بسنت معرفة شارع ।بالظبط عند حديقة الطفل فى مكرم عبيد।بتقف هناك تلقط رزقها ।رزقها بيبدأمن 100جنيه ولا يقف عند حد ।بسنت نشيطة وكلها حيوية ولا تكتفى بأوردر واحد فى اليوم (هى بتقول كدا)

علشان تلحق تعمل فلوس تشتغل بيها لحسابها فى أى حاجة।طبعا فى بالها إنها تعمل مؤسسة نموذجية للامؤاخذة الدعارة ।

ييجى سنة عدت عليا ماشوفتهاش ।واشوفها من غير معاد فى مكرم عبيد وكان صابع من إيدها اليمين مقطوع منه عقلة.।

-إزيك ؟اخبارك إيه؟

بسنت:الحمد لله।تمام ।أخبارك أنت إيه।؟

-بخير।فينك وإيه اللى عمل فيكى كدا؟

بسنت:الشغل।

-العمل عباده

بسنت:ولاد الحرام كتير ।بس ربنا بيسترها।

- بتقفى عند حديقة الطفل لسه؟

بسنت:بقالى३ أشهر مارحتش هناك وخدت شقة فى التجمع।

-والشغل ماشى إزاى؟

بسنت :عندى زباين بالتليفون।

-ونازلة مكرم إزاى وليه؟

بسنت:كنت بتابع عند الدكتورة।

-ألف سلامة।خير مالك؟

بسنت:أصلى حامل!!!!

قالتها بتلقائية دون إحساس بالعار أو انها متورطة فى حاجة أكبر منها

فكرت ثانيتين وقلت:فى الكام؟

بسنت:الرابع।

-شكلك لسه مكتشفة الحمل।هاتعملى إيه؟

بسنت:بالعكس !!أنا عارفة إنى حامل من3شهور ।

-ييعنى هاتحتفظى بالحمل ؟؟؟؟بحسبك بتروحى للدكتور علشان تنزليه।

بسنت:بصراحة استحرمت।وكمان دا رزق وجالى من عند ربنا।قلبى ماطاوعنيش।

-يعنى رحتى لأبوه وعرفتيه وقالك مافيش مشكلة وكدا؟

بسنت:أبدا أنا أصلا معرفش اللى بطنى ابن مين ।انت عارف الشغل ।والفترة اللى حصل فيها الحمل كان عندى شغل كتير ।

-بس هاتكتبى الواد باسم مين ؟

بسنت :لما أولد الأول وبعدين ربنا يحلها।

-سميه على اسمى ।

بسنت: لو ولد هاسميه عمرو ولو بنت هاسميها ........غادة ।

-جميل جدا ।عموما لو احتجتى حاجة اتصلى بيا ।رقمى معاكى ؟

بسنت:ميرسى يا عمور

-باى

-------------------------------------------------------

حرية العقيدة .....والعقيدة الحرة---2

التفكير ممارسة فردية؟
التفكير كواحد من الممارسات الإنسانية له أكثر من مستوى فالفرد يفكر ويقرر على مستوى نفسه .وقد يفكر لغيره ويقرر له .وأيضا يفكر لقومه أو لجماعته .
وعندما يفكر لغيره فإنه يتحلى بدرجة من المثالية لا يستطيعها عندما يفكر لنفسه .فالتفكير للغير دائما طوباوى.
وكلما كان لهذا الغير شخصية اعتبارية كان التفكير أكثر طوباوية ملتزما بمبادىء ولا يبالى كثيرا بالمنافع البراجماتية .لعلها آفة من آفات التفكير ؟؟؟؟
أم لعلها آفة من آفات البشر ؟؟؟؟؟؟؟
وهذا النوع من التفكير كمن يضع العربة أمام الحصان !!فالفكر فى هذه الحالة يخدم العقيدة .
والعقيدة هدف فى حد ذاتها .رغم عدم تعرضها للنقد .أو للوضع على المحك النظرى أو التطبيقى .
فمتبعها ناج وتاركها هالك ...حسب العقيدة نفسها .
________________________________________________________


ها أنك احترت وجعلت تفتش - مخلصا- فى كل مكان عن مسكن لعقلك .وهب أنك وجدته يجيب عن أسئلتك ويسبب لك الراحة المنشودة .فماذا أنت فاعل؟؟؟
ستدعو الناس الى ما اهتديت -مخلصا- ناشدا لهم الهداية .
:ولكن ما المشكلة فى أن تدعو الناس للهداية؟
المشكلة يا صديقى أنك تحجر على الناس فى أن يعيشوا حياتهم العقلية الخاصة .
فاختيارك لمذهبك كان نابعا من أسئلتك ومشكلاتك .ولو اعتبر كل مثقف ذلك لما سمعنا أقوالا مثل حتمية الحل الاشتراكى ....أو الليبرالى .....أو الإسلامى .او غيرهم من الحلول التى تقدم معلبة ومغلفة و سهلة الاستخدام .
___________________________________________________

يبدو للقارىء أن كاتب هذا المقال يعانى من مشاكل مع المرجعية .


يتبع

حرية العقيدة ....والعقيدة الحرة

يذهب كثير من الناس آمنين إلى معتقدات معينة ,ملتمسين الراحة والسكينة ...وبعد قليل من تمذهبهم تلك المذاهب يمسون متأكدين من ارتكانهم إلى الحقيقة .بل أنهم وحدهم من حازوا الحقيقة .
ولم يعد غريبا أن نجد كل التفرعات الناتجة عن أى ملة تدعى لنفسها دون غيرها أنها وحدها على حق.
الفارق بين ملة وأخرى أو فرع وآخر :أنك تجد من هذه المذاهب من يهدد مخالفية !!ومنهم من يسخر من مخالفيه!!؟؟ومنهم من يشفق على مخالفيه.
وفى كل الأحوال ...يتفقون جميعا على أن كل طائفة منهم وحدها حازت الحقيقة وسترتع حتما فى الراحة الأبدية .
ولا يجد أى من أئمة تلك المذاهب على أتباعه سوى أن يندمجوا سريعا وبشكل كامل فى دروسه وطقوسه وشعائره. ويصبوا علمه فى روءوسهم صبا .ليس هذا فقط ولكن عليهم أيضا أن يؤمنوا بما بدا له وأن يتصيدوا كل شاردة وواردة ليؤكدوا له صحة مزاعمه .
والويل كل الويل لمن انتحل نحلته ثم نأى عنها .فهو المغضوب عليه المطرود .الذى لنحسه ولعلة فيه لم يدرك قيمة ما كان بين يديه.
ويرى قطيع المؤمنين أنهم كثرة ,وأن المنشق عنهم قليل فيطمئن بعضهم بعضا أنهم ولابد على حق .وطالما أنهم على حق من البداية فلابد أنهم على حق فى النهاية .
ويظهر سؤال للمومنين:كيف نتعامل مع من خالفنا؟
وكيف نتعامل مع الإنتقادات الموجهة إلينا ؟
وهل هناك فرق بين من كان معنا ثم انشق وبين من كان مخالفا من البداية ؟

ويسمعون فى حماس إلى إمامهم الذى يفاجئهم بتسامحه مع مخالفيه. مطالبا إياهم بغض النظر عن هؤلاء الضالين .
_____________
إن ما أطرحه أكثر قابلية للرصد فى الطوائف الدينية عامة ولكنه ينطبق على الأتباع كل الأتباع .من كل الطوائف الدينية والغير دينية .
فمشكلة الموءمنين هى الاتباع
وقد يتصور البعض أنه عندما انتحل نحلته ما اتبع إلا عقله بعد ما قرأ وسمع واطمئن قلبه إلى صدق متبوعه.فما بقى عليه إلا اتباعه.

_____________________________

يتبع

حابس ....حابس

رن موبايلى فجأة الساعة 10 بليل:
-ألو ..مساء الخير استاذ عمرو ؟
-أفندم!!
-مدام (فريدة )كلمتنى عن حضرتك وبتقول إن حضرتك شخص جميل وحد محترم جدا .
أنا :تحت أمرك.
-ميرسى .يافندم أنا(مروة ) من التليفزيون من أسرة إعداد برنامج "فاشون هاوس" على قناة نايل فاملى.عاوزين نسجل مع حضرتك حلقة فى البرنامج.عن الستاير والمفروشات.
أنا:اوكى !!!مافيش مشكلة .بس مش لازم نقعد مع بعض علشان نحضر .
-نحضر إيه؟؟؟ممكن حضرتك تيجى قبل الهوا بنص ساعة تستعد فيهم .هو حضرتك ماطلعتش عالهوا قبل كدا؟
أنا: الحقيقة ماحصلش .طيب . مش محتاجة تقعدى معايا أفتحلك روءوس موضوعات ونعمل خطة عمل .أفتكر أنا مش هاطلع فى برنامج رأى سياسى .دا برنامج تقنية وتنفيذ أكتر منه رأى .
-حضرتك عاوز تيجى!!براحتك ممكن يوم الإتنين الساعة 12.
أنا :اتفقنا .هاجيبلك معايا نسخة من كتابى عن الستائر .
-ميرسى .
_______________________________________________________


يوم الإتنين رحت التليفزيون سألت على معدة برنامج فاشون هاوس
رد على موظف الاستعلامات بتعالى وعجرفة واضحة :
- معنديش اذن دخول ليك. هو فى ميعاد؟
أنا :هاطلبها فى التليفون .
فى التليفون قالتلى أنا هانزل آخدك من عالباب .
أنتظرت قليلا لأجد فتاه فى مقتبل العمر تأتى مبتسمة وقد عرفتنى رغم زحام المدخل .
-أستاذ عمرو ؟؟؟
أنا :أهلا بيك .(مادا يدى بالمصافحة )
وفى الأسانسير وجدت شروق مديرة الإعداد اللى لاحظت توترى فابتسمت وقالت مساء الخير حضرتك طبعا جيت هنا قبل كدا.
أنا :عمرى ما جيت هنا
مروة:تحب تشوف الاستديو اللى هاتصور فيه ؟
أنا :مش الفكرة .أنا بس عاوز أديلك النسخة دى اللى ممكن تساعدك فى الإعداد .ولو عندك أى استفسار تحت أمرك .
-استفسار زى إيه؟
أنا :هاتدخلى فى الموضوع ازاى؟
-ازاى صحيح؟؟؟؟؟؟
بدأت أعطيها روءوس موضوعات محورها الستائر وكانت تسجل الأسئلة باهتمام .
أكملت روءوس الموضوعات سبعة فوجدتها تقول :
-من السبع اسئلة دول هاقدر أطلع كمان سبع أسئلة .يعملوا معانا ساعة عالهوا .
أنا :البرنامج مدته ساعة ؟(يالهوى ..)فى سرٍى
-كل الضيوف بيبقوا مستكترينها فى الأول ويطلعوا يقولوا عدت بسرعة أوى .عموما حضرتك انا شايفاك مهتم وبتحب تعمل كل حاجة بنفسك .ممكن تحضر الحلقة الجاية من الاستديو.
تعالى يوم الخميس الساعة اربعة .
________________________________________________________

يوم الخميس الساعة اربعة مدخل اربعة --ماسبيرو
سألت الاستعلامات على الآنسة مروة من اسرة إعداد فاشون هاوس .
الاستعلامات:اسمك إيه؟
أنا:عمرو أمين عمران.
الاستعلامات بعد البحث على الكمبيوتر:ماعنديشالإسم دا.
أنا :هاطلبها عالتليفون .
طلبتها قالتلى هانزل اسمك حالا واعملك إذن دخول .
انتظرت قليلا ثم عاودت الكرة على الاستعلامات.
الاستعلامات:اسمك موجود من بدرى على فكرة .ممكن البطاقة ؟
وريتهاله فقرأها ثم ردها لى .
(عموما أنا عندى حساسية من الأمن بكل أنواعه)
-شكرا أطلع الدور كام ؟
الاستعلامات:السابع
عديت من بوابة زى بوابات المترو باستخدام التصريح واتجهت للأسانسير ودست على السابع.
عامل الأسانسير مكانش موجود بس الأسانسير ماطلعش لحد ما هامل الأسانسير جه.
دخلت الدور السابع لقيت مكتوب قدامى (إذاعة فلسطين) .
سألت أحد المارة قاللى معرفش سألت واحد تانى قاللى فى التالت .
نزلت التالت لقيت قناة النيل للأخبار .سألت واحد ماشى قاللى فى الرابع .
طلعت الرابع لقيت صوت العرب .
مروة طلبتنى على التليفون بتقوللى انت فين قلتلها أنا فى الرابع .
قالتلى :يا أستا ذ عمرو إحنا فى برج (ص)..ماسبيرو مبنى من 3 مبانى تعالالى فى ص الدور السابع.
لقيت واحد ابن حلال مشى معايا شوية وخرجنى من برج (س) الى (ص) وبعد كمان سوءالين لقيت استديو فاشون هاوس .
-----------------------------------------------------------------------------------------------

حضرت الاستديو من ورا الكاميرا واتعرفت على المذيعة والمخرجة .
البرنامج كان حلو .والضيف كان محترم ويستاهل تسمعله .
والتليفونات اللى كانت بتيجى الاستديو عالهوا كانت حقيقية والله العظيم .
الهوا خلص .سلمت عالضيف وقلتله كنت هايل .
اتكلمت شوية تانية مع مروة وشروق واتفقنا على تصوير البرنامج عالهوا الساعة خمسة يوم الخميس الجاى .
انتظرونى .

حلاق عاوز يفهم

مشهد ساعة عصارى عند الحلاق اللى جنب المحل.. التلفزيون بيذيع فلم لعادل إمام
الحلاق:إيه الناس اللى هما اضطهدوه؟!السنة ولا الشيعة ؟؟؟على ما اعتقد انهم الشيعة ...
أنا:هو مين؟؟؟؟؟
الحلاق:عادل إمام ...هههههه..(يضحك بدون مبرر)
أنا:السنة ولا الشيعة !!!!!!!!
الحلاق:اللى هما السنة اللى هما المسلمين مابيفكروش فى الحوار دا أوى .أكيد الشيعة (محاولا إنقاذ نفسه من سخريتى )
أنا:وأهدروا دمه ليه ؟
الحلاق:مش عارف!دا اللى أنا عاوز اعرفه.
أنا محاولا إجابته:هو عادل إمام بيشتغل إيه؟
الحلاق:ممثل.
أنا:ممثل إيه؟
الحلاق متململا:كوميدى.
أنا:أنت حلاق .أنا لما أزعل منك .أزعل ليه؟
الحلاق:أكيد لو الشغل وحش .أو قصًة مش مظبوطة
أنا :عادل إمام أكيد قال نكتة سخيفة .
الحلاق:وهما عشان ماضحكوش يقوموا يهدروا دمه؟إيه دا؟!!!!!
أنا :أفتكر كدا.
الحلاق:بس دا عليه حراسات كتير حتى وهو برا مصر ومش سهل حد يغتاله.
أنا:أكيد مستنيين لو حد شافه صدفة.
الحلاق:يبقى هو لازم يزود الحراسة.
أنا :يعنى الحكاية صعب.
الحلاق:بصراحة صعب جدا.
أنا :طيب يعملوا إيه؟
الحلاق:مش عارف.بس ممكن وهو بيصور فلم واحد ينشه من بعيد.
أنا :وهو يقول مش عاوز أموت مش عاوز أموت ..خد كل فلوسى وسيبنى أعيش.وبعدين القاتل يهرب على موتوسيكل جاوا وياخد طلقتين فى ضهره ويطرش دم ويقرفنا .
الحلاق:ممكن ياخد طلقة واحدة فى دماغة ويموت على طول .
أنا :الموتوسيكل الجاوا ممكن يطس فى أى حاجة قدامه ..ماينفعش .لازم ندى القاتل فرصة يركن الموتوسيكل قبل ما يموت.
الحلاق:طيب نعمل إيه؟
أنا :نحطله مسدس فى الشاى .

علاقات دولية

واحد سعودى عمل وليمة كبيرة لواحدأمريكى وعزم كل أهله علشان يضايفوا الراجل وخلا نسوانه يسووا أحسن أكل سعودى من كبسه ومندى والذى منه
الجماعة سووا الأكل وجابوه فى صينية كبيرة وحطوه فى وسط الرجالة قدام الضيف
الأمريكى انتظر شوكة ولا معلقة علشان ياكل .....مافيش
الراجل قال فى نفسه هاعمل زى ما هايعملوا
الرجالة ابتدوا ياكلوا بأيديهم وكوروا اللحمة فى وسط الرز ويعجنوا ويليثوا ...ويرموا فى بقهم
الأمريكى كان مبحبح وعمل زيهم
طبعا إيديهم اتعاصت وإيد الأمريكى قبلهم من صوابعه لحد ....المهم إيده كلها

الراجل خلص أكل واستنى حد ياخده للحمام عشان يغسل إيديه...مافيش
طيب لما الرجالة تخلص هايجيبو مية وأبريق .يغسل إيديه فى الصالون .....مافيش
أتارى الرجالة بيلحسوا فى إيديهم وينضفوها زى القطط
الأمريكى حاول يعملها نفسه ماطاوعتوش وكان هايرجع
الراجل مسك نفسه وانتظر لحد ما صاحب البيت نظف إيديه وحط إيديه الأتنين فى وشه وقال :شيخ!!!ممكن

ملاحظة عابرة

كنت ماشى النهارده فى شارع طلعت حرب وقريت هناوين الجرايد ولفت نظرى عنوان الجرنال الجديد ((الشروق))
اللى ماتحمستش لصدورها ولا لقرايتها من العدد التالت ....لأنى ما قريتش العددين الأول والتانى متعمدا.
العنوان الرئيسى للشروق النهاردة الأربع 25 فبراير كان ((مجلس الشعب يوافق على خفض رسوم التقاضى إلى النصف))
دلوقتى بس اتضحت الروح المحافظة اللى بتحكم الجرنال اللى كنت متوقعها
فرسوم التقاضى لم تنخفض للنص
الحقيقة انها تضاعفت 5 مرات بدل من 10 ودا بس من رأفة وحنان معالى وزير العدل
دا المفهوم من العنوان من الجرنال المحافظ
للأسف مالقيتش الرابط على بوابة الشروق الإلكترونية
اللى يلاقيه يقوللى عليه علشان أحطه

الكلام دا حصل

البطراوى:فى واحد مسيحى هايعلن إسلامه!
أنا:خايب
البطراوى :بتكلم بجد.
أنا:هو فاكر تحت القبة شيخ؟
البطراوى:بص بقى بلاش الكلام بتاعك دا .
انا :والله هو حر فى روحه .يا ترى إيه السبب عليه ديون ولا عاوز يتجوز؟
البطراوى :هايتجوز
أنا:هجرته إلى ما هاجر إليه
-------------------------------------------------------------------------------------
تانى ليلة الساعة تسعة يدخل البطراوى ثم ينادى إتفضل يا محمد
يدخل شاب قصير أسمر فى وجهه شارب وملامحه الصعيدية واضحة
محمد :سلامو عليكو
أنا:عليكم السلام _وأنا بانعدل
ظل محمد واقفا إلى أن أشار له البطراوى بالجلوس
البطراوى :هانروح المشيخة بكره؟
محمد :إن شاء الله
فهمت إن الشاب الصعيدى هو المسيحى اللى عاوز يدخل فى دين الله افواجا
البطراوى خدنى على جنب وكلمنى عن الولد شوية وقاللى اسمه الحقيقى وأنا حاسس إنى باشوف حدث لن يتكرر فى حياتى ثانية علشان فكرنى بعوض اللى أسلم علشان كان عليه ديون وحكاية زبالة كدا
-------------------------------------------------------------------------------------
تانى يوم كان البطراوى ومحمد بره بس وليد كان موجود وكان فرحان اوى علشان حاسس إنه بيشارك فى حاجة جامدة أوى
بعد شوية دخل البطراوى ووراه محمد ومعاه ورقة من مشيخة الأزهر تؤكد إسلامه!!!!!!!
جلس محمد فى صالوننا المتواضع بتواضع زائد وأدب ظاهر وطفق يسال عن الصلاة علمه وليد الفاتحة والصلاة على مذهبه بفرح
وليد دخل ينام والبطراوى نزل الشغل وفضلت أنا ومحمد اللى كان ماسك الموبايل ومابيبطلش كلام بصوت واطى جدا
عملتله شاى وشكرنى بأدب وقعدنا نشفط بالدور
انتهى من مكالماته وسالته بتشتغل إيه ؟
وبدأ بيننا حوار
عرفت إنه متجوز وعنده أولاد
أنا :مانتش مبسوط مع مراتك؟
محمد:عادى يعنى
أنا :فاكر إننا ممكن نديك فلوس ؟
محمد :لا والله يا أستاذ عمرو
أنا :عارف إنك بتدمر بيتك وولادك؟
محمد :ليهم رب
تركته ورحت لشغلى
وبالليل قاعدين نتعشى ومحمد أفندى بننادى عليه علشان ياكل معانا وهى مكسوف ولا مش عارف ماله
المهم قعد ياكل وقام بسرعة بعد لقمتين ورجع تانى وهو بيعيط عياط مر
والدموع نازلة من عينيه المسكين
مالك ...مالك
قال مافيش
وبعد شوية رجع البطراوى من البكلونة وهو بيقول البنت قالتله مش عاوزاك
بعد ساعه محمدطلبها فى التليفون وفضل يحايل فيها لحد ما رجعت فى كلامها
القصد أنا لاحظت إن الولد مؤدب بطريقة كويسة ومش ناقصة غير إنه يخبط على باب التلاجة ويستنى حد يرد
وكمان رومانسى ومن النوع اللى بيحب على نفسه
-------------------------------------------------------------------------------------
بعد يومين محمد راح اسكندرية علشان البنت اللى بحبها من هناك والبطراوى كلم عمر اخوه وقاله يقابل محمد كويس وتعمل معاه واجب
عمر اول ما شاف محمد شخر فى سره
لأن محمدمش ستايل خالص ولا شعره ناعم ومظهره عمالى جدا
وبعت رساله للبطراوى مكتوب فيها( أحا )
بس بعد يوم واحدعمر استريح للولد وكلمته عن زوقه وانه محترم جدا يعنى
فى هذه الأثناء كنت أنا ووليد بنتكلم فى الموضوع ووليد كان فرحان ومستبشر خير لنفسه وحاسس إن الملايكة قاعدين فى البلكونة وتحت السراير وجوا الدواليب وإن الشياطين عماله تسب وتلعن فى اليوم دا
قلتله:تعمل إيه لو واحد مسلم استنصر ؟
وليد :ملعون أبوه
أنا :طيب لو أنا دخلت عليك بواحد فى إيدى كان مسلم وعاوز يعلم مسيحيته.
وليد:هامنعك!!! يا راجل حرام عليك
أنا:بس انا هاساعده
وليد :ليه؟
أنا:علشان دا حقه
وليد :إزاى بس يا عمرو أنت بتهزر
أنا :لا والله بتكلم بجد
وليد :بس هاتروح النار
أنا:ههههههههههههههههههه أنت إرهابى.يعنى عاجبك اللى بيحصل دا محمد هايدمر نفسه وبيقوللك أهله هايقتلوه .عارف ...لو خانة الديانة فى البطاقة مش موجودة مكانش بقى فيه مشكلة وكان ايمان كل واحد حاجة تخصه.
وليد:تفتكر أهل البنت هايوافقوا؟
أنا :طبعا لأ
-------------------------------------------------------------------------------------
بعد تلات أيام عاد محمد وخدته بالحضن وسلم عليا بحرارة علشان إديته رصيد لما رصيده خلص فى نص الليل وكلام من دا
بعد ما كلت تلات حبات يوسفى سألته عن عمر وعن نسايبه المرتقبين
محمد :هايردوا علينا
أنا:قالولك الكلام دا إمته؟
محمد:يوم الأربع
أنا:والنهارده إيه ؟
محمد:الحد
أنا :يبقى خلاص يا معلم إنسى
محمد:فى ستين داهية!!!!!!!!!!!
أنا:يا واد يا جامد أنت من كام يوم كنت بتعيط؟
محمد:هانعمل إيه بس يأستاذ عمرو اهو الواحد من غلبه
أنا:خليك مسيحى وارجع لولادك ومراتك.
محمد:ماجادرش
أنا:أنت مخنوق منها أوى كدا؟
محمد :لا والله بس حاسس انى مستريح فى الإسلام
أنا:وكنت متضايق من المسيحية؟
محمد:لأ..بس حاسس إنى مسلم من زمان .
أنا :عشان معاشر مسلمين .هوماينفعش تعاشر المسلمين وتحبهم وأنت مسيحى ؟
محمد:ينفع
أنا:بقولك كدا بس عشان خاطر ولادك ومراتك اللى أنت هاترميهم وبعدين إسلام إيه اللى رايح تدخل فيه بلا نيله.
محمد: ماتقلش كدا يأستاذ عمرو حرام عليك!
أنا:يا حبيبى عيش حياتك وخللى إيمانك لنفسك وبلاش تلعب فى بطاقتك علشان انت فى بلد فاسد ومحدش هايساعدك .
محمد:اللى فيه الخير يجدمه ربنا
أنا:انت لما بتدخل ربنا فى الموضوع بتشلنى ومابعرفش أرد عليك
-------------------------------------------------------------------------------------
الكلام دا حصل فى الفترة الأخيرة ومش عارف محمد اللى أنا مش عاوز أقول اسمه الأصلى علشان سلامته هايحصل معاه إيه