نظر لى كلوز تو إيل بأمل وقال :
-عزيزى حسن السؤال نصف العلم _فكر فى أسئلتك كويس وصيغها مظبوط واسمع إجابتى .
أنا :طيب عاوز أعرف الزعامات الدينية راحت فين ؟بس ممكن قبل ما تجاوبنى تقولى إذا كان الناس بيتحاسبوا كل واحد حسب دينه ولا طريقة الحساب موحدة ؟
كلوز تو إيل :الناس -كل الناس -قيادات وعوام بيتحاسبوا بنفس الطريقة .بس المقياس المطلق مختلف عن عن مقاييس الناس المرتبطة بالمصالح والعادات والتقاليد .
أنا :يعنى إيه مقياس مطلق ؟
كلوز تو إيل :الخير من حيث هو خير والشر من حيث هو شر .
انا :يعنى أنا لقيت سقراط فى الجنة وكذلك فولتير والمرحوم غاندى !طبعا بمقياس الخير المطلق والشر المطلق الناس دى كويسة .دى فهمتها .لكن مقاييس الخير والشر عند الزعامات الدينية مقاييس خاصة .بل محلية .يبقى بيتحاسبوا إزاى ؟
كلوز تو إيل :رجال الدين فرضوا على أتباعهم مقاييس شديدة المحلية للخير والشر .كانت مرتبطة بأسلوب حياة الناس فى المنطقة وفرضوها بنفوذهم .
أنا :طيب !النفوذ دا جابوه منين ؟
كلوز تو إيل:اكتسبوه من أتباعهم !اللى كانوا ماشيين وراهم فى الصح والغلط .وعملوا دعاية من قديم الأزل لحد ما صدقوها ورجال الدين صدقوا أنفسهم .
أنا :كلامك دا يشمل كل رجال الدين حتى الأنبياء ؟
كلوز تو إيل :عزيزى ..أنت باين عليك مثقف ! هاكلمك على أساس إنك عندك حد أدنى من المعرفة يخليك تفهمنى .
أنا :تفضل .
كلوز تو إيل :آدم أبو البشر كانت قضيته هى (الأمن )كان بيخاف من الموت وعاوز يؤمن لنفسه احتياجاته المعيشية لأنه كان حاسس دايما بالخطر .
أنا :ودا علاقته إيه بسؤالى ؟
كلوز تو إيل :أنت مش فتحت موضوع الأنبياء ؟أنا ش هاقدر أكلمك بشكل عام او سطحى .وطبعا سؤالك عن الأنبياء وعلاقتهم برجال الدين مالوش محل من الإعراب بالنسبة لآدم .لكن أنا حبيت أجاوبك إجابة موسعة علشان تقدر تفهم كل نبى لوحده .
أنا معلش أعذرنى أصلى متعود على إن اللى أسأله على حاجات زى كدا يكلفتنى ويقوللى هى جت كدا .
كلوز تو إيل :معلش أنا عاذرك -اتكلمنا عن آدم بعد كدا ييجى إبراهيم ودا كانت قضيته مختلفة .
أنا :إزاى ؟
كلوز تو إيل :قضيته كانت الحرية .لأن المجتمع البابلى كان فيه آليات خضوع مركبة من أصغر طفل لأكبر راس فى بابل .من خضوع الطفل لأمه والأم لزوجها والزوج لأمه وكل هذه المنظومة الأسرية تخضع لرئيس قبيلة أو عشيرة والكل يتبع الكهنة ومن فوقهم الملك الذى يدعى الألوهية وأنه يميت ويحيى .إبراهيم كان فتى حر .حطم كل التابوهات البابلية المرموز لها بالأصنام .ودعوة التوحيد تبعه تعنى عدم الخضوع للتابوهات الفاسدة والتعلق بالمطلق .
أنا :المطلق بتاع هيجل ؟
كلوز تو إيل :خلينى أكمل علشان منخرجش عن الموضوع .
أنا تفضل .
كلوز تو إيل :خللى بالك إن إبراهيم ما كانش حواليه حد لا كهنة ولا شعب ولا دياولو .
أنا :وبعدين
كلوز تو إيل :بعد كدا ييجى موسى وقضيته كانت مختلفة عن آدم وعن إبراهيم .
أنا :إزاى يعنى ؟
كلوز تو إيل :آدم كانت مشكلته الأمن وإبراهيم كانت مشكلته الحرية ,أما موسى فمشكلته كانت العدالة.
أنا :دى واضحة جدا .
كلوز تو إيل :بس خللى بالك إن الثقافة البابلية افترست الرسالة السماوية بمجرد موت يوشع بن نون .
أنا :وحياتك دا كان فى احكام سماوية بتتعدل وفقا للتوجهات البابلية فى حياة موسى .ومتنساش حادثة قتل حمور بن شكيم فى حياة يعقوب .
كلوز تو إيل :برافو عليك
أنا :برافو عليا ؟!لحد دلوقتى مش حاسس إنك بتجاوب على سؤالى عن رجال الدين .
كلوز توإيل : لو تصبر شوية هاتفهم .ممكن أكمل كلامى ؟
أنا :تفضل .
كلوز تو إيل :مؤسسة الكهنة ظهرت بعد موسى .
أنا :لكنها كانت موجودة قبل موسى وقبل ابراهيم كمان فى بابل وغير بابل .
كلوز تو إيل :بس ربنا ماقالش عليها . لكن البشر دايما يعملوها .ابراهيم كسرها بس كان لوحده وموسى كسرها لكنها ظهرت تانى من بعده .والمشكلة إنها من ناحية الشكل تبنت مطالب موسى وترفع شعاراته .ولكن من حيث المضمون هى آلية خضوع ضد مبادىء ابراهيم و آلية إرهاب ضد مبادىء آدم .
أنا :إزاى يعنى ؟ دا الواحد لما يسمعهم وهما بيتكلموا تحس إن كارنيه الجنه فى جيب الشيخ .
كلوز تو إيل :إنت ما خدتش بالك إن أى مؤسسة دينية دايما تطالب شعبها بالخضوع للحاكم والصبر عليه وإن كان ظالما .؟
أنا :آه .
كلوز تو إيل :الحاكم الظالم المستبد دايما احكامه قهرية
ودايما بيخضع شعبه لسلطته المطلقة ويرهبه ويخليه فقير ومحتاج والسلطة الدينية هى أول حاجة بتساعده على إنه يحقق الظلم والخضوع والفقر .
أنا :بدأت أفهم .
كلوز تو إيل :بعد كدا ييجى عيسى .
أنا :قضيته كانت إيه ؟
كلوز تو إيل :كان الله يرضى عليه بيدور على سعادة إنسان واحد .
أنا :أنت باين عليك بتحبه .صح ؟
كلوز تو إيل :فعلا أنا بحبه لأن توفير العدل والحرية والسلام غير كافى لتحقيق السعادة على المستوى الشخصى .
أنا :قصدك تقول إنه كان بيدور على سعادة كل فرد لوحده مش مبادىء وشعارات عامة زى اللى قبله .
كلوز تو إيل :يعنى الفرق اللى بينه وبين اللى قبله إن قيمهم كانت مجتمعية وهو كان بيدور على سعادة إنسان واحد .
أنا :ودا علاقته إيه بموضوعنا ؟
كلوز تو إيل :ماهو المؤسسة الدينية كانت عندها الكفاءة لابتلاع دعوته ثم إعادة إصدارها من جديد فى منظومة خضوع وظلم وفقر وإرهاب وحروب لا تنتهى .
أنا :كدا أنا فهمت قصدك .
كلوز تو إيل :لسه فى واحد مهم جدا .
أنا :قصدك سيدنا محمد ؟
كلوز تو إيل :أنت بتحبه ؟
أنا :بحبه علشان بحس إنه عالمى بس أتباعه محاصرينه فى نقطة العروبة .
كلوز تو إيل :معاك حق .أنا مش قلتلك فى الأول إن البابليين قاوموا النصائح السماوية ولما مقدروش يقضوا عليها استسلموا وبعد شوية بيرجعوا كل حاجة لسابق عهدها والتاريخ بيعيد نفسه لكن سقف المطالب بيرتفع مع كل دعوة .
أنا :وازاى دا حصل مع سيدنا محمد ؟.
كلوز تو إيل :هو حافظ على مطالب اللى قبله مجتمعة .لكنه أكد وبصراحة على عدم وجود مؤسسة دينية وأكد استقلالية الأفراد عن المؤسسات .وعدم مسئولية المؤسسات عن أى أفراد
أنا :أنت عمال تلف وتدور .قصدك براءة المتبوع من التابع وكل واحد مسئول عن نفسه وكدا .صح ؟
كلوز تو غيل :مخيبتش ظنى فيك .برافو عليك .
أنا :يا عم الملاك أنا سألتك عن رجال الدين لقيتك بتجاوبنى عن الأنبياء .عاوز توضيح أو لنقل صراحة .
كلوز تو إيل :يعنى الشيوخ والكهنة وكل رجال الدين ونساؤه مالهمش اصل .وسيدى المسيح حذركو من الأنبياء الكذابين والمسحاء الكذابين .وسيدك محمد حذركو من علماء السوء وهما لو كانوا عددهم بسيط مكانش الأنبياء شغلوا بالهم بالتحذير منهم لكن دول كتير أوى .
أنا :بنسبة كام يعنى ؟
كلوز تو إيل 99,99999فى المية ..
انا :طيب أنا عاوز أشوف حد منهم .
كلوز تو إيل :فى جماعة من اللى قتلهم كمال أتاتورك بيتحاسبوا لسه .تيجى نروح نشوفهم ؟
أنا :دول كانوا بيقولوا إن دول شهداء وفى الجنة حدف .
كلوز تو إيل :دول لسه بيتحاسبوا علشان طول لسانهم وكلامهم الكتير باسم ربنا وإدعائهم إنهم على حق .وخللى بالك إنهم كانوا من أركان الظلم والقهر والفقر والإرهاب فى دولة بنى عثمان .
أنا :ياللا نلحقهم .نفسى اتفرج .
كلوز تو إيل :اركب جنبى .
ركبت جنبه وما إن أغلقت الباب حتى وجدت نفسى مع كلوز تو إيل أما ملاك يقول لآخر :شيوخ الدولة العثمانية اتاخدوا من هنا فسألته :ماتعرفش راحوا فين .؟
الملاك :النار يا كابتن .
أنا :ياللا يا كلوز تو إيل نسبقهم على هناك .
كلوز تو إيل :أنا عارف الباب بتاعهم تحب نستناهم قدامه ؟
أنا :ماشى .ووصى يحضروا غدا ومكان ظل نقعد فيه .
كلوز تو غيل :أوكى إنزل خلاص وصلنا .
لقيت الغدا محطوط على ترابيزة فوقها شمسية قعدت آكل وقبل ما أخلص أكل لقيت أوتوبيس مكسر وبيطلع دخان من كل ناحية وصل وبينزل منه شيوخ دولة بنى عثمان
وقفوا شوية على ما ينادوا أساميهم
سمعت واحد من الشيوخ بيقول للى جنبه "مالنا لا نرى رجالا كنا نعدهم من الأشرار"قلت لكلوز تو إيل :
سمعت يا صديقى يظهر إن ربنا نفسه علمانى .؟
