الأربعاء، أبريل 02، 2008

عندما وجدت نفسى روحا بلا جسد

_بطراوى !!!! سوق بسرعة زى ما انت عاوز بس بلاش حركات مفاجئة عشان بنخض.-
-قلبك خفيف .-
هو انت مركب معاك شوال بطاطس ....انت بتبقى عارف انك هاتقف أو هاتلف ...أنا ببقى بتكلم أو بتفرج عالشارع .ألاقيك رازعنى فى--مطب .
_لو ماسوقتش كدا مش هانعرف نمشى -.
_أنا هاربط الحزام ...هى فين البتاعة ...على الله يكون شغال ؟ -
-شغال -
...............................
لسه بشد الحزام قام أحمد خد يمينه عشان يعدى من عربية نقل فى اللحظة اللى دخلت عربية هوندا من شارع جانبى .-.
-حاسب يا أحمد !!!!!!! -
خيشنا أنا والبطراوى فى العربية الهوندا وراسى اتخبطت فى التابلوه ....قبل ما أحط الحزام طبعا .
أغمى عليا ...ويمكن طلعت روحى ....التابلوه عليه بقعة دم وهدومى كذلك
الناس اتلمت ...شكلها كدا حالتى كانت خطر
بعد مناقشات متعجلة فضل البطراوى نقلى لمستشفى قريب وصرف النظر عن الحادث من خوفه عليا
كان عمال بيهز فيا وأنا مابحطش منطق .
كنت فى حالة ضعف شديدة ولا أتحمل خبطة فى تابلوه سيارة مسرعة وأنا جواها فضلا عن نزيف فى الرأس
شالونى بطريقة أو بأخرى
فيما سمعت صوتا ينادى :
-عمرو أمين عمران .!!!!!!!!!! -
نظرت بخاطرى لا بعينى تجاه الصوت الملائكى
-نعم ...رديت بأدب -.
الصوت الملائكى:تعال هنا !
-هنا فين ؟ -
الصوت الملائكى :حيث لا حيث
-نعم -.
الصوت الملائكى :أنت معملتش خير فى دنيتك ...
- يا لهوى !!!! -
الصوت الملائكى :اسكت خلينى اكمل ..ونظر إلى ورقة بين يديه كمن يلقى بيانا واستأنف أنت معملتش خير فى دنيتك .بس ما عملتش شر .عشان كدا صدر قرار بإنك تاخد قصر فى طرف السور فيه خدمات معقولة .
- معقولة إزاى يعنى ...إيه الأوبشنز بالظبط ؟ -
زغر لى صاحب الصوت الملائكى بعد أن تكثفت صورته حتى أراها وقال :
- تقصد إيه ؟ -
مين معايا فى القصر ..ومين الجيران ...وأقدر أروح فين ؟ومين اللى هايجينى ..وإيه الخدمات اللى جوا القصر ؟ -
الصوت الملائكى :عندك تليفون ..أطلب أى حاجة هاتجيك دليفرى .ومعاك فى القصر حبيبتك .ولما تسكن تقدر تضيف خدم وشغالين .وجيرانك ناس من مستواك .
-طيب ..القصر دا ملك ولا قانون جديد ؟ -
الصوت الملائكى :ممممممممممممم!؟ممكن تترقى وتاخد حاجة أحسن ..أنت واستعدادك لو كملت النقص اللى فيك
-ممكن أزور حد او حد يزورنى ؟ - الصوت الملائكى:ممكن ...بس ما تباتش بره.
-قبل ما أسكن عاوز اطمن على ناس معينة -
.
الصوت الملائكى :ناس مين ؟أنت غلباوى ليه
-سقراط وفولتير وغاندى
الصوت الملائكى :انت مالك ومال الناس دى !
-بحبهم وبحس إنى مديون ليهم .وعاوز اطمن عليهم -.
الصوت الملائكى : ملفاتهم مش معايا .
يعنى هما هايتحاسبوا بطريقة تانية ؟ -
الصوت الملائكى ممممممممممممم؟
- وحياتك يا ملاك ...شوفهم فين وطمنى عليهم - .
الصوت الملائكى :إيه دا ؟..بنى أدم غريب ...أنا ماليش دعوة بالحاجات دى --
بس أنا ليا -
الصوت الملائكى :اسمع ...قصرك هناك أهو تعالى اسلمهولك ونعمل جرد للحاجات اللى فيه
-إيه البيروقراطية دى ...يا ملاك دى الجنة من غير ناس ما تنداس .أنت ماسمعتش المثل دا ولا إيه؟
وأنا عاوز ةالناس دى
الصوت الملائكى :اسمع أنا مش فاضى ...عندى شغل ..فى واحد بعدك عالدائرى
.- ماليش دعوة ..هاتهملى ..ولازم تعرف إنى عاوز ناس -
تانية بس أنا إتفاجئت بموتى ...هاقعد مع نفسى شوية .وأقلك .بس التلاتة ....... دول أساسيين
.
الصوت الملائكى :أنت هاتعطلنى !!!...أقلك إيه بس ؟ماهو أنت لما لقيت نفسك فى الجنة اتدلعت .
- حاسب ؟!!!!!!!!! -
الصوت الملائكى :اللهم لا اعتراض
-بسرعة اخطف رجلك وهاتلى الناس دى معايا وإلا مش منقول من هنا -.
الصوت الملائكى :بص .فى هنا بند اسمه الشفاعة ..ممكن تحت البند دا نجيبلك الناس دى ...بس تملى استمارة شفاعة
-روح هاتها بسرعة ؟. -

هناك 12 تعليقًا:

^ H@fSS@^ يقول...

رااااااااااااااائع
بجد مش مجالمة
انت طلعت عين الملاك يا حرام
بيقولوا انه بقى شيطان بعد ما عمل معاك الحديث ده
كفرته يعني
منك لله

Desert cat يقول...

طيب انا كمان عايزة استمارة شفاعه
هى بكام ومنين
ولا ابعت لى الملاك بس مش الملاك اللى كان معاك
اصل على راى حفصه بيقولوا بقى شيطان
تحياتى

^ H@fSS@^ يقول...

بص مش حقولك غير على حاجة واحدة كان واحد علمهالي
ربنا يكفيك شر رزالة العمرانية
:D

DantY ElMasrY يقول...

يعنى موافقين على الجزء الأول ؟
طيب الملاك هايروح جرى يجيب الإستمارة ونشوف ايه اللى هايحصل

Layla يقول...

شفاعة...هي الواسطة والكوسة بقت في الجنة كمان

ديب ينفع اوصي على حد واخده معايا لو رحت النار ولا مينفعش ؟

DantY ElMasrY يقول...

مارفل
دى رؤية فنية تسميها مسرحية او روائية انت حر
ماتمسكليش عالواحدة
وعموما لسه فى جزء تانى واللى انت هاتعمله فى النار شىء يخصك

فاتيما يقول...

يااااه
موش معقولة
اخيرااا
دخلت مدونتك و بكتب تعليق كمان ؟
لأ دا انا زاعقلى نبى بقى
يا سيدى معرفش انت عملت إيه بس تشكر عليه عشان أعرف ازورك و أشوف الحاجات الحلوة اللى انتا كاتبها دى
بص الحوار دا فكرنى بمسرحية زمان لعالى سالم اسمها "الراجل اللى ضحك على الملايكة " و كمان فكرتنى برواية يوسف السباعى "نائب عزرائيل "و كمان مصطفى محمود كانله كتاب بمعنى قريب من دا موش فاكرة اسمه دلوقتى ...
بس رغم كل دا حاسة انك معالج الفكرة من زاوية ىخرى خالص
و بتشدنى اعرف اللى هيحصل إيه بعد كدا ...
سعيدة قوى بدخولى هنا يا دانتى
اهو نرد زيارة واحدة من زياراتك

DantY ElMasrY يقول...

فاتيما
انا غيرت التيمبليت عشان خاطرك والله العظيم
لأنه كان تيمبليت صعب ومش اى كونيكشن ينزله
بس كل الإعدادات راحت
فداك يا فندم
انا مستنى شوية والجزء التانى جاهز فى دماغى
متفق معاكى انه فى تشابه مع نائب عزرائيل فى فكرة انه بتحكى عن ما بعد الموت من وجهه نظر الميت الشخصية
لكن المعالجة ليها ابعاد مختلفة عن نائب عزرائيل تماما
ورغم ان اللغة المستخدمة سوقية لكن فى عمق نفسى حد يلمحه ويكتشف مابين السطور
خصوصا فى وصف الأماكن والأزمنة

زمان الوصل يقول...

قلت لى بقى !! أصل كل ما كنت أحاول أدخل مدوّنتك من الشغل مالاقيش غير صورة التلات قرود -كانت حلوه أوى على فكره- وماشوفش أى حاجه تانيه !! كان لازم أستنّى أدخل من البيت !!

بس لونك الجديد حزاينى ليه كده !! الخلفيه لونها غامق فعلا :(

سؤال قد يدل على ضعف التذوّق الفنّى بس بردو هاسأله :) يا ترى الحكايه دى بتعبّر عن قناعاتك انت؟ موضوع "مين هيكون معايا" و "جنّه من غير ناس ماتنداس" ولاّ دى قناعات البطل و انت بتحكيها لنا بس؟

أصل حسّيت بشوية استغراب أو لنقل تعارض مع هذه الفكره و فكره أخرى طرحتها فى مدوّنه سابقه حول الأسره و فكرة إنّها نواة المجتمع و أهميّة الانفصال عن قيودها -طبعا مش بانقل الكلام بالحرف لكن المعنى الذى أذكره- فحسّيت شويّه إن فيه اختلاف .. إيه الموضوع؟ أفصح أبن :)

فاتيما يقول...

يا فندم أخجلتمونا
يا رب يخليلك بس برضو كدا أفضل عشان الناس كلها تعرف تتواصل معاك
و نصيحة كدا من تحت لتحت ...
يا تفتح الخلفية بتاعة البوست و لتكن بيج مثلا
يا أما تخلى البنط هوه اللى فاتح و ليكون أصفر كناريا او بيج يعنى حاجة بس معاكسة للخلفية عشان الكلام يبان اكتر
و معلش بقى بغلس عليك بس بجملة التغييرات بقى
تحياتى و كلك ذوق

DantY ElMasrY يقول...

عارفه يا فاتيما:انا نزلت التيمبليت دا بسرعة ولما جيت اقرا حسيت بمعاناه فعلا بص انا طردت الكائنات الفضائية والمكان نضف هاغير خط الكتابة واعمل التعديلات اللازمة
زمان الوصل:طبعا انتى سؤالك دا بيخترق المنظومة العقائدية المتينة للعبد لله بضربة واحدة وعموما هذا سؤال شرحة يطول وأنا الليلة ناوى انزل الجزء التانى
ولكن انا حاسس انك تقدرى تفهمى ما اريد بشكل جيد
وخلينى فى حالى

DantY ElMasrY يقول...

زمان الوصل :مافيش تناقض ولا حاجة يا فندم لو رجعتى للبوست اللى قصدك عليه -تأصيل لموضوع قديم -هاتلاقينى مش رافض الأسرة ككيان ولكن ارفض اعتبارها وحدة تكوين المجتمع
علشان المجتمع الصح يتكون من افراد احرار
الأسرة كيان تعاونى متضامن
لكن دور الأب فيه انه يربى ولاده
تربية صالحة ويسيبهم يعيشوا حياتهم
يعنى يحترم شخصيتهم الفردية
دالموضوع هنا بقى مختلف من ناحية ومتوافق من ناحية تانية
هنتكلم عليها بعد الجزء التالت
رأيك يهمنى